Kadaghan na nisuway pero napakyas ang mga Duterte sa paglumpag sa administrasyon ni Presidente Ferdinand Marcos Jr. Si kanhi Presidente Rodrigo Duterte mismo ang nangulo sa Maisug rallies sa Davao, Sugbo ug ubang bahin sa Pilipinas kapin sa duha ka tuig nang nilabay aron pag-awhag sa kasundalohan ug kapolisan pagbakwi sa ilang suporta sa commander-in-chief.
Pero walay nisunod niya. Bisan ang mga sibilyan wala motapok sa ilang rallies. Wala kakita og rason sa pagprotesta batok ni Marcos Jr. Nga iyang gipasanginlan nga adik sa cocaine ug nagplano pag-usab sa konstitusyon.
* * *
Laing nausik nga kahigayonan pagpalagpot ni Marcos: Napakyas ang mga Duterte sa pagsakay sa tapok sa duha ka milyon ka mga sakop sa Iglesia ni Cristo (INC) niadtong Enero 2025. Mga tigpasiugda nipadayag og pagsupak sa impeachment ni Bise Presidente Sara Duterte pero wala mosaway sa administrasyon.
Wala mahadlok sa INC, gidayon sa mga kongresista ang pag-impeach ni VP Sara sa Pebrero 2025. Wala na gani magtagad ang INC sa pagprotesta. Bisan sa pagdakop ug pagbalhog ni Duterte sa prisohan sa International Criminal Court sa The Hague sa Marso sa niaging tuig.
* * *
Napakyas sab ang mga Duterte pagsakay sa unang Trillion Peso March sa EDSA batok sa flood control scandal atol sa anibersaryo sa martial law sa Septiyembre 21 sa niaging tuig.
Dihang nibalik pagprotesta ang INC sa Nobyembre sa niaging tuiga, nagdumili ang kadagkoan sa pagsaway ni Marcos Jr. Gani, gidid-an sa pag-apil sa ilang tapok sa Luneta ang Duterte supporters nga nagbitbit og placards ug streamers nga “Marcos resign!”
* * *
Nipasidaan sila og kalibotanong rallies sa pagtimaan sa birthday ni kanhi Presidente Duterte sa Marso karong tuiga. Pero, gawas sa Davao City, mingaw ang mga protesta. Wala mapagawas si Duterte sa prisohan ug wala mapalayas si Marcos Jr. sa Malakanyang.
Pakyas sab ang gitakdang people power karong buwana. Ginamit ang 18 ka nangangkong kanhi marines nga nibisto sa giingong mga maleta nga puno sa kinawat nga kuwarta sa flood scam. Kay wala silay napakita nga mga ebidensiya. Naglisod ang katawhan sa pagpangita og rason pagkuyog sa ilang kawsa. Nga mas unang nakapa-priso ni Senador Jinggoy Estrada ug naglambigit sa uban nilang mga alyado.
* * *