CEBU, Philippines — Subling mitambag ang City of Talisay-Traffic Operation Development Authority (CT-TODA) ngadto sa mga motorista nga susihon gyud ang mga sakyanan o motorsiklo sa di pa kini momaneho.
Kini aron kalikayan ang disgrasya gumikan sa mechanical error.
Gawas pa niana, kung luya ang lawas likayan ang pagkupot sa manobela aron likay sa disgrasya.
Niadtong Martes sa hapon, usa ka dumptruck nga nagkarga og graba ang nalimbuwad ug nakaigo pa og duha ka multicab nga nagparking daplin sa karsada diha sa sitio Crossing, Barangay Campo 4, Dakbayan sa Talisay.
Ang drayber sa dumptruck nga nag inusara ang bugtong nadala sa tambalanan human nakahiagom og bun-og sa lawas.
Ang drayber sa truck una nang nipadayag nga nawagtangan og brake ang iyang gimaneho nga dumptruck.
Si Jonathan Tumulak, pangu sa CT-TODA niingon nga wala ray nakalas sa hitabo. (BANAT NEWS)