CEBU, Philippines — Gihangyo ni Cebu City mayor Michael Rama ang mga organizers sa Central Visayas Regional Athletics Association kon CVRAA meet nga atimanon ang panginahanglan sa tubig sa mga partisipante sa kalihukan sa paugnat sa kusog. Gimandu usab sa mayor ngadto sa mga organizers nga sigurohon nga limpyo ang billeting areas kun puy-an sa mga players.
Ang mayor gikatakda nga makigtagbo sa mga organizers aron tukion ang dugang pa nga hisgutanan ug final touches sa dul-an usa ka semana nga sports event.
Nasayran ang opening venue sa kalihukan himoon diha sa South Road Properties (SRP) sa alas sayes sa hapon karong May 4, 2024.
Gipaabot nga moabot sa 12,000 ang partisipante sa kalihukan nga gilangkuban sa 8,500 ka athletes, ug uban nga mga coaches ug mga opisyales.
Taliwa sa krisis sa tubig nga nasinate sa Cebu City gipaniguro nga ang mga tunghaan nga butangan sa mga atleta adunay deep wells nga maoy ilang magamit isip tinubdan sa tubig uban sa pakig-alayon usab sa Metro Cebu Water District (MCWD).
Samtang ang mga haduol nga barangay ang gi-tap usab aron mohatag og dugang supply sa tubig.
Gipaniguro usab nga adunay internet connection sa mga billeting quarters ingon man dunay saktong bintilasyon sama sa igong gidaghanon sa mga electric fans sa matag room. Gusto ni mayor Rama nga masiguro nga maatiman gayud ang 12 mil ka mga partisipante sa CVRAA meet ug kinahanglan ang mga organizers mangandam sa tanang contingencies ug padayon ang ilang trabaho hangtud nga kini mahuman. (BANAT NEWS)