CEBU, Philippines - Nisaka na usab og singko pesos ang presyo sa manok matag kilo sa kamerkadohan sa syudad sa Sugbo tungod sa pagsaka sa demanda niini sugod sa milabay’ng semana.
Ang mga nanag-iya og karnehan sa kamerkadohan sa syudad ilabina sa Taboan Public Market miingon nga sa pagkakaron niabot na sa 135 pesos ang presyo sa manok matag kilo.
Sigon pa niini nga ang mga suppliers maoy mipasaka sa presyo maong gipatas-an usab nila ang ilang presyo.
Hinuon ilang gitataw nga dili na bag-o alang kanila nga mosaka ang presyo sa manok sa bulan sa Disyembre sanglit mosaka man ang demand sa manok tungod sa holiday season.
Sa niaging tuig sa bulan sa Disyembre, ang presyo sa manok niabot na og 140 pesos matag kilo
Ug tungod niini, dili sila makasiguro nga ang pagtaas sa presyo sa manok sa makaduha na ka higayon mao na ang katapusang pagsaka sa niini.
Gipahibawo hinuon nga nagpabilin pa gihapon ang presyo sa karne sa baboy nga anaa sa P190 matag kilo ug ang karne sa baka nga anaa gihapon sa P210 kada kilo.(/EIM)(BANAT NEWS)