Fernandez, PSC staff negatibo sa COVID-19
MANILA, Philippines — Lubus-lubos ang pasasalamat ni Philippine Sports Commission (PSC) Officer-in-Charge (OIC) Ramon Fernandez sa Panginoong Diyos.
Ito ay dahil walang nagpositibo sa kanilang mga empleyado, kasama ang ilang national athletes at coaches, sa coronavirus disease (COVID-19).
“We are thankful to the Lord that the PSC community is free from COVID-19. We hope and pray it stays that way,” wika ni Fernandez, dumaan din sa Reverse Transcription Polymerase Chain Reaction (RT-PCR) test o swab testing.
Ang lahat ng kanilang mga empleyado pati na ang ilang national athletes at coaches ay sumailalim sa swab-testing noong nakaraang linggo.
Nagsagawa ang PSC ng RT-PCR tests para sa 112 PSC staff, kasama ang ilang miyembro ng national team, sa Rizal Memorial Sports Complex (RMSC) sa Manila City at 88 sa PhilSports Complex sa Pasig City.
“We are proud to say that both PSC complexes, which is under a high-risk area since we have venues housing COVID-19 patients, can be declared COVID-19 free,” ani PSC Medical Scientific Athletes Services (PSC-MSAS) Unit chief Dr. Randolph Molo.
“We conducted the test to give the confidence back to the regular workforce, occupants, athletes, and coaches who frequently go to PhilSports and RMSC,” dagdag nito.
Ipinatutupad ng sports agency ang health at security protocols ng Department of Health at Inter-Agency Task Force (IATF) sa kanilang mga pasilidad.
- Latest
