Kaibigan (201)
ANG kasunod ay ang mainit na pagmamahalan nina Dex at Lara. Mula sa sopa ay lumipat sila sa kama. Walang namagitang salita sa kanila. Tila nagkaisa ang kanilang iniisip na ganun ang mangyayari at wala nang makakapigil pa sa kanila. Hindi nila malilimutan ang sandaling iyon na nagsanib ang kanilang mga hubad na katawan. Nasumpungan nila ang hindi maipaliwanag na ligaya.
Para kay Dex, mahal naman talaga niya si Lara. Hindi dahil ‘yun ang nakasaad sa huling habilin ni King na kung mag-aasawa siya ay si Lara na ang piliin. Talagang nagkaroon na ng pitak sa kanyang puso si Lara. Kung walang pitak sa kanyang puso si Lara, papayag ba siyang magtungo rito sa Saudi. Isa sa dahilan kaya gusto niyang makarating dito ay hindi lamang dahil sa trabaho kundi para makasama si Lara. Mahal niya si Lara at siguro ay mahal din siya ni Lara.
Para makasiguro, tinanong niya si Lara habang magkayakap sila sa ilalim ng kumot. Nakita ni Dex ang maaliwalas na mukha ni Lara. Dinama niya ang makinis na pisngi.
“Mahal mo ba ako Lara?’’
“Oo naman.’’
“Ako rin mahal kita.’’
“Pareho tayong nagmamahal sa isa’t isa. Mula pa noong dumating ka rito sa Riyadh, minahal na kita.’’
“Ako rin. Hindi ko lang masabi sa’yo.’’
“Bakit?’’
“Siyempre nahihiya. At saka hindi ko alam kung ano ang damdamin mo para sa akin.’’
“Ang hina naman ng pakiramdam mo. Ako na nga ang pumupunta sa room mo hindi mo pa gets?’’
“E siyempre naman, nakikiramdam pa ako. Mahina nga siguro ang pakiramdam ko.’’
“Mabuti na lang nagkusa kang pumunta rito sa room ko. Kung hindi baka nagpapakiramdaman pa tayo.’’
“E mabuti rin at nakaisip kang gumawa ng gimik na kunwari ay parurusahan ako. Ibang klase ka Lara, ha-ha-ha!’’
Nagtawa rin si Lara.
Niyakap nang mahigpit ni Dex si Lara. (Itutuloy)
- Latest