Kaibigan (33)
BAGAMA’T panatag na ang loob ni Dex sa kalagayan ni King, ang pinuproblema niya ay kung paano sasabihin kay Lara ang nangyari.
Tiyak na hinihintay na ni Lara ang tawag o text niya. Tiyak din na hindi mapakali si Lara sa bahay dahil kay King. Naghihintay ng balita sa nangyari sa asawa.
Pero naisip ni Dex, wala namang ibang magbabalita kay Lara ng mga nangyari kundi siya.
Siya ang nakaaalam kaya dapat lamang niyang sabihin kay Lara ang lahat. Hindi na siya dapat maglihim pa,
Isa pa, ligtas na naman si King. Wala nang dapat pang ipag-alala. Dapat ipaalam na niya kay Lara ang lahat.
Kinuha niya ang cell phone sa bulsa at sinimulang idayal ang number ni Lara.
Sumagot agad si Lara.
‘‘Hello Dex?’’
‘‘Lara.’’
‘‘Nakita mo ba si Dex?’’
‘‘Oo.’’
‘‘Nasaan siya?’’ halos naiiyak na si Lara.
Ikinuwento ni Dex ang mga nangyari. Detalyado. Wala siyang inilihim.
Nang matapos niyang ikuwento, bumunghalit ng iyak si Lara.
‘‘Huwag kang umiyak, ligtas si King. Nasa mabuting kalagayan na siya.’’
Patuloy sa pag-iyak si Lara.
‘‘Mamaya ililipat na siya sa private room. Huwag kang mag-alala at akong bahala. Hindi ko siya pababayaan.’’
‘‘Salamat Dex.’’
‘‘Tatawag ako sa iyo mamaya. Huwag kang mag-worry.’’
Ibinaba na ang phone.
Tinungo naman ni Dex ang nurses station para magtanong ukol kay King. Baka tapos nang operahan at ililipat na ng room.
(Itutuloy)
- Latest
