Kaibigan (32)
NAGMAMADALING tinungo ni Dex ang ER at sumilip sa bintanang salamin para makita ang kalagayan ni King. Ano na kaya ang nangyayari sa kaibigan niya? Bakit malakas ang kaba niya?
Nang silipin ni Dex ang kinaroroonan ni King, nagulat siya sapagkat bakante na ang kamang kinahihigaan nito kanina. Iginala niya ang paningin at baka inilipat lamang ng ibang kama.
Pero hindi niya nakita si King.
Saan kaya dinala si King?
Anong nangyari sa kaibigan niya?
Hindi mapakali si Dex. Kailangang may makausap siyang doktor o nurse kaya na galing sa ER. Ang mga ito lamang ang makasasagot sa katanungan niya ukol kay King.
Hindi naman siya puwedeng pumasok sa ER sapagkat mga doktor, nurses at iba pang hospital staff ang pinapayagan doon.
Ipinasya ni Dex na mag-abang ng sinumang lalabas para may mapagtanungan. Kailangang malaman niya ang kalagayan ni King. Bakit nawala ito sa ER.
Ayaw isipin ni Dex na patay na si King at dinala ang bangkay sa morgue. Ayaw niyang isipin iyon pero bakit nagsusumiksik sa utak niya.
Hindi patay si Dex!
Hindi patay ang kaibigan niya!
Hanggang isang doktor ang nakita niyang lumabas sa ER. At natandaan niya, na ito ang doktor na umaattend kay King kanina. Hindi siya maaring magkamali.
Sinalubong niya ang doktor.
“Doktor good morning po. Kaibigan po ako ng lalaking inaasikaso mo kanina, nasaan na po siya?’’
‘‘Ah ‘yung nasaksak. Nasa operating room siya. Pero don’t worry, ligtas siya. Kailangan lang linisin ang sugat.’’
Nakahinga nang maluwag si Dex.
“Salamat po Doktor.’’
“Mga one hour lang siya sa OR at ililipat na siya sa ibang private room.’’
“Salamat po.’’
Nang makaalis ang doktor, walang hanggan ang pasasalamat niya sa Diyos.
Salamat po at niligtas mo ang kaibigan ko.
Nagbalik si Dex sa waiting area at naupo roon.
Ang iniisip niya ay kung paano sasabihin kay Lara ang nangyari kay King.
(Itutuloy)
- Latest
