Huling Eba Sa Paraiso (134)
“Humanda ka Drew, mukhang kalaban ang mga ito,’’ pabulong na sabi ni Luke nang makitang humarang sa daraanan nila ang dalawang lalaki na mga mukhang sanggano.
“Nakahanda ako, Luke.’’
Pero nakahinga sila nang maluwag sapagkat nang magsalita ang isa sa mga lalaki, natiyak nilang hindi kalaban ang mga ito.
“Magandang gabi po mga Sir. Saan po ba ang daan patungo sa restaurant. ‘Yung sikat na restaurant dito sa bayan. Hindi po namin makita.’’
Si Drew ang sumagot.
“Sa unang kanto, kumanan kayo at makikita n’yo ang restaurant.’’
“Marami pong salamat mga Sir,’’ sabi ng lalaki.
“Walang anuman.’’
Umalis na ang dalawang lalaki.
Nagpatuloy naman sina Drew at Luke patungo sa kinapaparadahan ng kanilang sasakyan.
“Akala ko mga kalaban na, Drew. Wala pa naman akong dalang kargada.’’
“Akala ko rin, Luke. Kasi sa itsura ng dalawa parang mga goons na bataan ni Mr. C.’’
“Yun din ang hula ko, Drew kaya sinabihan kita na maghanda.’’
‘‘Mabilis naman ako sa takbuhan, ha-ha-ha!’’
‘‘Iiwanan mo ako, ha-ha-ha!’’
Nakarating sila sa sasakyan ni Drew. Umalis na agad sila.
Habang nasa sasakyan, sinabi na ni Luke ang mga gagawin nila kinabukasan.
‘‘Babalik uli tayo bukas sa club. Magmamanman uli tayo.’’
“Hindi kaya mabuti ay sa sunod na araw na lang Luke. Huwag bukas. Masama ang kutob ko na may mangyayaring hindi maganda bukas.’’
“Sige.’’
“Kapag kinutuban ako, nangyayari talaga.’’
“Tama ‘yan. Maski ako kapag kinutuban, hindi ko tinutuloy. When in doubt, don’t.’’
Hindi nga sila tumuloy.
Pero may masamang balitang natanggap si Drew mula kay Marianne. Tinawagan siya nito sa phone. (Itutuloy)
- Latest