Ahas sa garden (416)
“MAG-INGAT ka Love! May patalim ang addict na ‘yan!’’ Sabi ni Nicole kay Alexis. Nakakubli si Nicole sa isang malaking punongkahoy.
Maya-maya pa, dumaluhong na ang addict. Hinalihaw ng saksak si Alexis.
Mabilis na nakailag si Alexis. Patay kung patay kung sumugod ang addict. Palibahasa’y naluto na ang utak sa kasisinghot ng shabu kaya wala nang pakialam sa mundo.
Nang sumalakay muli ang addict, isang malakas na tadyak sa dibdib nito ang ibinigay ni Alexis. Bumagsak sa damuhan ang addict.
Lalong naulol ang addict. Muling sinugod si Alexis at inundayan ng mga saksak. Naiwasan ni Alexis ang mga saksak na halos ga-buhok lang.
Kailangan ni Alexis ng pamalong kahoy. May kaunti siyang nalalaman sa arnis na natutuhan niya sa kanyang lolo (ama ng kanyang ama). Mahusay sa arnis ang kanyang lolo at sikat na sikat noong dekada 60.
“Nicole, ikuha mo ako ng kapirasong kahoy. Kahit sanga ng bayabas! Bilis!’’
Mabilis na kumilos si Nicole. Binali niya ang sanga ng punong bayabas na nakita niya sa ‘di-kalayuan.
Pagkatapos ay inihagis kay Alexis.
“Saluhin mo Alexis!’’
Sinalo ni Alexis. At tamang-tama sa pagsalo, sumalakay ang addict.
Pinalo ito ni Alexis sa ulo.
(Itutuloy)
- Latest
