Ahas sa garden (378)
HABANG naglilinis ng bahay ay binabalikan ni Nicole ang pangyayari kung paano siya napunta sa gate ng bahay ni Mang Alexis ng gabing iyon na hinahabol siya ng lalaking tauhan ng KTV na pinagdalhan sa kanya para pagsayawin ng hubad.
Kung sa ibang gate kaya siya napunta at hindi sa gate ni Mang Alexis, ganito rin kaya ang buhay na hinantungan niya. Maaaring hindi. Baka napariwara pa siya. Baka pag-interesan pa siya kung mayroon mang tutulong sa kanya.
Mabuti na lamang at kay Mang Alexis siya napunta. Siguro dahil dasal siya nang dasal na sa mabuting tao siya dalhin ng kanyang mga paa. Sa totoo lang, pagod na pagod na siya noon kaya sumalampak na lamang siya. Doon siya nakita ni Mang Alexis at naawa sa kanya. Napakabuti ni Mang Alexis. Kinupkop at binigyan siya ng trabaho.
Hindi alam ni Nicole kung paano magagantihan si Mang Alexis.
ISANG araw na walang pasok si Nicole, nagulat siya nang biglang dumalaw si Mang Alexis.
“Pasok ka Mang Alexis.’’
“Ang ganda ng bahay mo, Nicole.’’
“Salamat po.’’
Hindi malaman ni Nicole ang gagawing pag-istima kay Mang Alexis.
(Itutuloy)
- Latest