Ahas sa Garden (318)
NAGKITA sila ni George sa isang Chinese restaurant na malapit sa casino na pinaglalaruan niya noon. Tanaw sa bintana ang casino.
Nasa restaurant na si George nang dumating si Brenda. Naka-order na ito ng Hainanese chicken, canton, chopsuey at lumpiang shanghai.
“Kumain ka muna Bren, marami tayong pag-uusapan tungkol sa idedeliber mong epektos mamayang gabi.’’
“Gaano karami ang pag-uusapan natin?’’
“Basta marami kaya kumain ka muna.”
Sumandok ng kaunting kanin si Brenda saka pumiraso ng fried chicken at kumutsara ng chopsuey.
Nagsimula itong kumain.
Nakatingin naman si George.
“Ang ganda mong tingnan kapag ngumunguya, Bren.’’
Umirap si Brenda at ipinagpatuloy ang pagkain.
“Kumusta ang unit ng condo mo?’’ tanong ni George.
“Okey naman.’’
“Nakakatulog ka na nang mahimbing.’’
Tumango si Brenda.
Matapos kumain, sinabi na ni George ang mga gagawin ni Brenda sa pagdedeliber ng ecstacy.
“Marami ang idedeliber mo mamaya. Malakihan ito, worth P20-M! Malaki rin ang mapapasaiyo rito kapag naideliber mo nang maayos.’’
“Magkano ang sa akin?’’
“One million!’’
Napatango si Brenda.
“Bagong dating kasi mula Tate ang epektos at kailangan ay madispatsa na agad.”
“Kayang-kaya ko ‘yan.’’
“’Yan ang gusto ko sa’yo Bren.’’
Tapos nang kumain si Brenda.
Hanggang sa matanaw niya sa bintana ang casino.
“Diyan ako dati naglalaro sa casino na ‘yan. Marami akong naubos na pera diyan.’’
“Puwede ka na uli maglaro d’yan kapag nadeliber mo ang epektos. Madalas din ako diyan. Batang casino rin ako.’’
Napangiti si Brenda.
Bigla, mayroon siyang naisip.
(Itutuloy)
- Latest