Ahas sa Garden (106)
UMALIS si Alexis at naiwang nag-iisip si Manang makaraan silang magsagutan.
Naisip ni Manang na mali yata ang ginawa niyang paghahamon kay Alexis. Baka nga isumbong siya kay Sir Nath tungkol sa “ahas” na inilagay niya sa swimming pool. Tiyak na tatanungin siya ni Sir Nath kung bakit niya inilagay ang “ahas”. Mabubuking siya at malalaman na mayroon pala siyang masamang balak kay Brenda. At tiyak na palalayasin siya nito. Mababaliktad ang pangyayari kapag nagkataon. Sa halip na si Brenda ang mapalayas, siya ang tatalsik sa bahay na ito. Kapag nagkaganoon, malaya na si Brenda sa anumang gawin dito sa bahay at lalo nang walang magagawa ang mga anak ni Sir Nath.
Nagpasya si Manang na habulin si Alexis para pakiusapang huwag magsumbong kay Sir Nath pero mabilis itong nakapasok sa kuwarto. Hindi na sumunod si Manang kay Alexis at baka isipin pang nagmamakaawa siya. Siguro naman, hindi siya basta-basta isusumbong ni Alexis dahil may pinagsamahan din naman sila. Isa pa, kaya lang naman niya inilagay ang “ahas” sa pool ay para rin naman mailigtas siya sa panunukso ni Brenda. Matatakot kasi si Brenda sa “ahas” at dahil doon, lalayas ito.
Baka maisip iyon ni Alexis at huwag nang magsumbong kay Sir Nath. Sana ay ganun nga ang mangyari. At napabuntunghininga si Manang nang malalim.
(Itutuloy)
- Latest
