Ahas sa Garden (36)
MABILIS gumawa ang mga trabahador ng swimming pool. Sanay na sanay sa ganoong gawin. Mabilis na nahukay ang bahaging pool na dating kinaroroonan ng mga magagandang orchids.
Habang pinanonood ni Alexis ang mga trabahador ay nag-iisip siya kung bakit ura-urada si Sir Nath sa pagpapagawa ng swimming pool. Nawalan tuloy ng puwesto ang mga orchids na alaga ni Mam. Nakapagtataka pa na ang laging bukambibig ni Sir Nath ay huwag pababayaan ang orchids. Lagi diligin ang mga ito para mamulaklak.
Pero ngayon, sira na ang puwesto dahil hinukay na. Ang magagandang orchids ay nasa isang sulok at ngayon ay pawang alikabok na dahil sa hinukay na lupa. Para mailagay lahat ang orchids ay isiniksik niya sa pader. Ang iba ay inilagay muna niya sa mga gulayan. Ihahanap pa niya ng mapapaglagyan. Ayaw naman niya ipamigay dahil sayang. Mamahalin ang orchids na koleksiyon ni Mam, May binili pa raw sa Los Baños. Pawang namumulaklak na ang orchids. Baka maapektuhan ang pamumulaklak dahil sa paglilipat-lipat ng lugar.
Ikalawang araw ng construction ng swimming pool ay lumabas si Manang at nalungkot siya sa nakita dahil ang kinalalagyan ng mga orchids ni Mam ay nahukay na.
“Saan mo inilagay ang orchids, Alexis?’’
“Sa sulok! Isiniksik ko roon para magkasya. Yung iba nasa gulayan.’’
“Kawawa naman ang mga alaga ni Mam. Bakit kaya naisipan ni Sir na magpagawa ng swimming pool?’’
“Hindi ko alam!’’
“Baka inudyukan ni Brenda!’’
(Itutuloy)
- Latest
