Sadiq(176)
SA dami ng mga gustong mag-seminar ukol sa pagnenegosyo, lubhang naging busy si Sadiq at JayR. Tuwing Sabado at Linggo ang seminar na ginagawa sa bakuran ng bahay ni Sadiq. Halos mapuno na ng mga gustong magseminar ang bakuran.
‘‘Kaya mo pa ba Sadiq?’’ tanong ni JayR matapos ang maghapong seminar.
“Oo. Kaya pa.’’
“Sa isang linggo, sina Pakito at ang iba pa nating kasamahan na naging successful entrepreneur ang pagsalitain naman natin. Marami na silang maibabahagi at nagmula pa sa sariling karanasan. Iyan ang magandang marinig ng mga gustong magnegosyo.’’
‘‘Sige imbitahin natin sila. Mahusay namang magsalita si Pakito di ba? At saka nakapagsalita na siya noon di ba?’’
“Oo Sadiq. Mabiro nga si Pakito. Maraming makikinig sa kanya.’’
‘‘Hindi kaya busy siya? Baka marami siyang gagawin?’’
“Hindi makatatanggi ang mga natulungan mo Sadiq. Tiyak na hindi ka mapapahiya.’’
“Sige ikaw na ang bahalang kumontak kay Pakito at iba pa nating kasamahang entrepreneur.’’
ISANG araw, matapos ang seminar. Nilapitan si Sadiq ng isang lalaki. Nagulat siya sa sinabi ng lalaki na isa raw OFW sa Saudi.
‘‘Tulungan mo akong magnegosyo, Sadiq. Dito na lang ako. Ayaw ko nang bumalik sa Saudi. Pinendeho ako ng misis ko!’’
(Itutuloy)
- Latest
