‘Lend Me Your Ears!’

Kung naaliw kayo nung nakaraang Linggo

Sa “Mga Asar Sa History” na kwento ko,

Eto pa ilang napili ng Ang Poet N’yo,

Itutula muli kahit pwedeng ikwento!

Nang si Mary, Queen of Scots pinugot ang ulo,

Medyo pumalpak pa ang sablay na berdugo!

Nang ihataw palakol ‘di nakuhang one blow

Kaya NABITIN pa ang puputuling ulo!

Sa leeg kasi tila hindi dumiretso

At waring tumama muna sa bungo nito!

Kaya ginawa parang nilagare kuno

Lamang nagdurugtong sa leeg at sa ulo!

Ngek! Ngunit palpak ‘di pa nagtatapos dito

Dahil pagkapugot dapat itaas ulo

Upang mga saksi doon makita ito

Pero sumabit na naman ating berdugo!

Pagkat noon pala nakapeluka tao

Kaya nung dinampot na pinutol na ulo,

Hawak n’ya sa buhok itinaas n’ya ito!

Nakalas sa buhok ngek! Nahulog ang ulo!

Kung suriin talaga kasaysayan ng tao,

May mga kadiri rin sa tunay na kwento!

Tulad putol na tenga nama’t hindi ulo

Sa “nakidnap” daw ni John Paul Getty na apo!

Nang dinukot kasi apo ng bilyonaryo

At humingi ng ransom sa mayamang Lolo,

Si J. Paul Getty ay medyo nagdiskumpyado

Na pakulo lang ito ng rebeldeng apo!

Nang ‘di pansinin mga kidnappers sa gusto,

Pinadala tenga ng apong kapiraso!

Bayad si Lolo pero siningil din ito

Sa anak … may patong pang apat na porsyento!

Ngek! Pero sandali may napansin lang ako —

Sa tatlong sikat sa kasaysayan ng tao

Tungkol sa TAGPAS NA TENGA ay konektado

Lahat kay Peter and Paul o PEDRO at PABLO!

Mga John Paul Getty … Lolo, anak at apo!

At sino makakalimot kay Vincent Van Gogh?

Matapos kay PAUL Gauguin ay makipagtalo,

Tinagpas daw tenga n’ya sa init ng ulo!

Subalit kinokontra ng iba ang kwento

At si Gauguin daw talaga pumutol dito!

Nang ipinagtanggol lang ang sarili nito

Sa biglang pagsugod sa kanya ni Van Gogh!

Syempre pa si PETER o Apostol na PEDRO

Nang si Hesukristo na ay inaaresto!

Tenga ni Malchus tagpas sa espada nito!

Binalik lang ng Maestro sa isang milagro!

At ‘yan ang huli N’yang himala bilang tao!

Ang una’y ‘yung kasal sa Cana diumano

Nang kapusin sa alak itong salu-salo,

Nakiusap Inang Maria ng milagro!

Ano koneksyon ng dalawa palagay n’yo?

TINAGPAS NA TENGA at KASAL ng kung sino?

Sabi kay  San Juan Ebanghelista raw ito!

Kay Hesus at Magdalena naman daw mismo!

Whoa! Cut it! Este medyo nahihilo na tayo!

Ops teka, sa palagay lang ng Ang Poet N’yo —

Kahulugan ng pinutol na tenga’y ito —

‘Wag basta maniniwala sa narinig n’yo!