Pagpadayon sa laksot nga kabilin

Usa sa labing laksot nga kabilin sa administrasyon ni kanhi Presidente Rodrigo Duterte mao ang iyang pagluba sa agrikultura. Gipitlok niya ang mga mag-uuma pinaagi sa pagpabaha sa imported nga bugas humay. Nga, sukwahi sa iyang pasalig, wa mapahimusli sa mga konsumidor.

Nabantang ni sa mga numero, nga di malalis bisan pa og magpasalipod siya sa gubat sa Ukraine ug sa nag-ung-ong nga krisis sa kalibotanong ekonomiya, sa pagtidlom sa produksiyon sa agrikultura kay gipasagdan ang mga mag-uuma ug sa pag-triple sa gidaghanon sa bugas humay nga gikompra gikan sa ubang kanasuran.

 * * *

Palihug basaha ug hilak:

• Niadtong 2016, sa iyang pagbanos sa Malakanyang, 5% ray imported sa kinatibuk-ang panginahanglan sa bugas humay. Sa iyang pagbiya karong tuiga, 15% na sa tinuig nga panginahanglan sa bugas humay ang kinompra gikan sa Vietnam ug Thailand; ug

• Sa pagsugod sa administrasyong Duterte niadtong 2016, ang agrikultura nakatampo og 10.4% sa gross domestic product (GDP), o kinatibuk-an nga kita sa nasud. Sa iyang pagkanaog sa katungdanan sa udtong tutok gahapon, nihiyos ngadto sa 9.6% ang tampo sa agrikultura ngadto sa GDP.

 * * *

Gipasalig ni Duterte nga ang Rice Tarrification Law nga iyang gipirmahan niadtong 2019 modugang sa suporta sa mga mag-uuma. Sama sa saad pagbadlong sa drugas ug pangurakot, napakyas siya. Ang paghiyos sa agrikultura maoy ebidensiya nga giulug-ulogan ra niyang mga mag-uuma.

Naapiki sab ang mga mangingisda. Daghang salamat sa iyang pagtugot sa China nga nitilok sa mga isda sa West Philippine Sea ug sa iyang mga alyado nga maoy gipasanginlan nga smugglers sa mga produkto sa agrikultura.

 * * *

Nabawo sab ang mga konsumidor sa pasalig nga motibugsok ang presyo sa kamerkadohan kay gawasnon na nga mangompra og bugas si bisan kinsang negosyante. Nalansang ang presyo sa bugas humay ug naglaway lang ang gagmayng negosyante. Ang niburot pag-ayo mao ang rice cartel nga gidominahan na sa, nakatag-an ka, taga Davao.

Di orihinal ni Presidente Ferdinand Marcos Jr. ang iyang pasalig sa kampanya nga himuong ?20 ang kilo sa bugas humay. Igo lang siyang nangopya ug nibutang og numero sa paukyab ni Duterte. Ug daghang salamat sa ilang pataka magpabiling mag-antos ang mga konsumidor, mga mag-uuma, ug mga mangingisda.