Mapakyas ang pagpitlok sa media

Karong udtong tutok manamilit ang administrasyon nga nanggukod sa mga sakop sa media nga nangahas sa pagsukwahi sa ilang linya sa propaganda, nangiyugpos sa awhag sa hustisya para sa gipamatay nga mga magsisibya ug mga peryodista, nilampos pagpahilom sa kinadak-ang network sa radyo ug telebisyon ug bag-o lang nipatigbabaw sa desisyon pagkandado sa labing isog nga online publication.

Karong udtong tutok sab mobanos ang bag-ong administrasyon nga nipabaha og bakak sa social media ug determinadong magpabilin sa gahom pinaagi sa pagpasud sa Malakanyang sa vloggers nga ilang alyado sa pagpangilad.

* * *

Di sayon ang sunod nga unom ka tuig para sa mga sakop sa media nga padayong nagtuo nga ang ilang tahas mao ang paghatag og tingog sa labing kabos nga way katakos sa pagpanalipod sa ilang mga interes ug pagbisto sa mga pangabuso sa mga nagtungkawo sa gahom.

Hinaut nga ang umaabot nga kalbaryo di makapawong sa ilang kaligdong. Hinunoa makapalig-on sa pagsukol sa tentasyon pagpili sa mas sayon nga ruta sa kaubanan sa propesyon–ang pagtila sa lapalapa sa dagkong opisyal sa gobyerno sa pamasin nga mapiskan sa ilang kinawat.

* * *

Pila ka semana sa di pa moasumir si President-elect Ferdinand Marcos Jr. gipahilom na ang usa sa labing inilang kolumnista sa nag-una nga nasudnong pamantalaan. Nga giapiki sa gumagawas nga administrasyon. Ug nagpakita na og mga timaan nga posibleng mapaluhod na gyod sa bag-ong pamunoan.

Unsay mahitabo kon hingpit nang mapatak-om ang mga sakop sa media nga napamatud-an nang lantip ug matinud-anon? Ug mapulihan sa trolls nga igo lang mangopya sa fake news nga isabod sa nagbuhi nila?

* * *

Ang bentaha mao nga ang lehitimong mga sakop sa media dunay kapanaminan. Kay di ni unang higayon nga gihulgang luokon ang kamatuoran. Kataposang nisuway paghimo ini mao ang diktador nga amahan sa umaabot nga presidente.

Malipayon ming motaho nimo nga, bisan unsaon pa nila og lubag ang kasaysayan, napakyas si Marcos Sr. sa paglubong sa gawasnong prinsa. Ang bentaha mao nga mas daghan ang bag-ong mga plataporma ug mas mapuslanon ang bag-ong mga teknolohiya. Gikinahanglan hinuon ang samang kamamugnaon sa atong katiguwangan pagbandilyo sa tinuod nga mga panghitabo aron mapukaw sa di pa hingpit maulipon ang kinabag-an.