Mga presyo sa lana ug kuryente
Ambot mogaan ba, o mosamot hinuon kabug-at, ang paminaw sa mga motorista, mga pasahero, ug mga konsumidor kon ikumparar ang nagsulbong nga presyo sa lana sa Pilipinas ngadto sa atong silingang mga nasud sa Southeast Asia: Ang Pilipinas maoy ikatulo nga kinamahalan og gasolina; ikaduha nga kinamahalan og krudo; ug ikaduha nga kinamahalan og kuryente.
Malaysia ang kinabaratohan sa gasolina ug krudo. Samtang Myanmar ang kinabaratohan og kuryente. Sa pikas nga bahin, Singapore ang kinamahalan sa gasolina, krudo, ug kuryente pero mao sab ang kinadak-an og suweldo ug ekonomiya sa tibuok rehiyon.
***
Niang among nasubay nga mga presyo sa kada litro sa gasolina sa Southeast Asia sugod sa kinabaratohan: Una ang Malaysia, P25.49; ikaduha ang Brunei, P25.95; ikatulo ang Indonesia, P65.42; ikaupat ang Myanmar, P68.65; ikalima ang Vietnam, P78.88; ikaunom ang Thailand, P82.43; ikapito ang Cambodia, P86.70; ikawalo ang Pilipinas, P91.65; ikasiyam ang Laos, P102.40; ug ikanapulo ang Singapore, P127.94.
Aron mas maklaro ang pagkumparar, nia sab ang presyo sa kada litro sa gasolina sa ubang pinili nga mga nasud: Mas mahal ang China (P81.72) kay sa Estados Unidos (P74.99) ug Japan (P68.48).
***
Nia sang mga presyo sa kada litro sa krudo sa Southeast Asia sugod sa kinabaratohan: Una gihapon ang Malaysia, P26.75; ikaduha ang Brunei, P36.36; ikatulo ang Thailand, P54.15; ikaupat ang Vietnam, P71.33; ikalima ang Indonesia, P71.77; ikaunom ang Laos, P74.17; ikapito ang Myanmar, P78.44; ikawalo ang Cambodia, P84.68; ikasiyam ang Pilipinas, P93.85; ug ikanapulo ang Singapore, P119.30.
Sa ubang bahin sa kalibotan, mas mahal ang kada litro sa krudo sa Estados Unidos (P82.65) kay sa China (P73.79) ug Japan (P59.90).
***
Niang bayranan sa kada kilowatt-hour sa kuryente sa Southeast Asia sugod sa kinabaratohan: Myanmar, P1.81; Laos, P2.18; Malaysia, P2.74; Vietnam, P4.43; Indonesia, P5.31; Thailand, P5.85; Cambodia, P8.21; Pilipinas, P9.02; ug Singapore, P9.85.
Kinamahalan ang kada kilowatt-hour sa kuryente sa Japan (P12.25) kon ikumparar sa Estados Unidos (P8.70) ug China (P4.59).
- Latest
