Papating nilang Marcos ug Duterte
Ang kabangis sa paugat nilang outgoing President Rodrigo Duterte ug President-elect Ferdinand Marcos Jr. pagpabilin sa excise tax sa lana, bisan sa pagsulbong sa presyo nga nanakod na sa inadlawng mga palaliton, mas nabantang tungod sa duha ka balita nga nagsunod og gawas karong semanaha:
• Una, nagpabiling ubos ang presyo sa lana sa Malaysia, wa ra gani katunga sa presyo sa Pilipinas, tungod sa dakong subsidy sa gobyerno; ug
• Ikaduha, ang pag-awhag ni US President Joe Biden sa Kongreso pagsuspenso sa federal tax sa lana hangtod sa Septiyembre ning tuiga.
* * *
Nadapit ang atong pagtagad sa kabarato sa lana sa Malaysia dihang napiskan sa ilang suplay pinaagi sa barter ang probinsiya sa Tawi-Tawi, nga duha ka oras ra gikan sa Sabah, ug gipamaligya sa tag P65 kada litro. Mas nakugang ta pagkahibawo nga gipaginansiyahan na pag-ayong presyo sa Tawi-Tawi. Mas barato pa g’yud sa Malaysia kay gawas nga oil producer ug exporter nihatag pa g’yud og subsidy ang gobyerno:
• ?25.39 kada litro ra ang gasolina (44% ang subsidy); ug
• ?26.64 kada litro ra ang krudo (46% ang subsidy).
* * *
Ang nag-ung-ong nga suspenso sa buhis sa lana sa Estados Unidos nakabisto unsa kataas ang excise tax nga gipamugos ni Presidente Duterte ug ipadayon ni Marcos Jr.: P2.58 kada litro ang federal tax samtang sa Pilipinas P10 kada litro sa gasolina, P6 kada litro sa krudo, P5 kada litro sa kerosene, ug P3 kada litro liquefied petroleum gas (LPG).
Karong tuiga, P28.75 kada litro na ang kinatibuk-ang saka sa presyo sa lana sa Estados Unidos samtang sa Pilipinas P44.25 kada litro sa krudo, P29.50 kada litro sa gasolina, ug P39.65 kada litro sa kerosene.
* * *
Naningkamot si Biden nga mobaratong lana aron di mapapas ang iyang mayoriya sa Senado ug House of Representatives sa eleksiyon sa Nobyembre karong tuiga. Way problema sa eleksiyon ang mga lider sa Pilipinas.
Si Duterte mokanaog sa katungdanan sa udtong tutok karong Hunyo 30. Si Marcos Jr. makapauraray sa 31 milyones nga nipili niya sa niaging eleksiyon. Dako ang tentasyon nilang Duterte ug Marcos nga magpapating. Nagkahulogan og kalbaryo sa katawhan sa mosunod nga unom ka tuig.
- Latest
