Kapilian sa media  

Ambot unsay mas seryuso nga hulga sa katungod sa pagpakisayod sa mga magbubuhis ug mga sakop sa media:

- Ang pagdili sa pagpangutana (sama sa pag-ban ni Presidente Rodrigo Duterte sa Rappler gikan sa tanang press conferences ug ubang kalihokan sa Malakanyang); o

- Ang dili pagtubag sa pangutana (sama sa pag-isnab ni Atty. Vic Rodriguez, tigpamaba ni Presumptive President Ferdinand Marcos Jr., sa Rappler sa press conference human sa eleksiyon); o

- Ang dili pagtarung og tubag sa pangutana (sama sa pagbugalbugal ni Rodriguez sa beteranang peryodista nga si Raissa Robles).

***

Ang masulub-on nga kamatuoran mao nga way nahimo ang publiko ug ang media sa pag-insistir sa ilang katungod nga magpakisayod. Way nakabadlong sa pagpanggukod sa pamunoan ni Presidente Duterte nilang Maria Ressa ug kaubanan sa Rappler. Mahimong mas maapiki pang Rappler ug ubang media organizations ubos sa mobanos nga administrasyon.

Napamatud-an nilang Duterte ug Marcos nga, salamat sa ilang troll army, mahimo nilang laktawan ang lehitimong mga sakop sa media. Mahimo gani nilang pahilumon ang labing dagkong media organizations (sama sa pagbasura sa aplikasyon sa ABS-CBN para sa bag-ong prangkisa).

***

Mahimong mas lisod pa ang kinabuhi sa mga sakop sa media sa mosunod nga katuigan. Samtang ang ilang edukasyon ug kasinatian nakahatag nila og katakos pagbisto ug pagkurihir sa fake news, way garantiya nga modaog sila batok sa mas saba, mas organisado ug mas dagko og suweldo ug benepisyo nga trolls sa administrasyon.

Napamatud-an sa eleksiyon sa Mayo 9 nga gipalabi sa mas daghang botante ang pagpaminaw sa pataka ug nagkayuring nga kasayuran sa TikTok ug ubang iresponsableng social media platforms.

***

Samtang naghinapos ang termino ni Presidente Duterte ug nagkaduol ang pagpuli sa sunod nga administrasyon, ang mosunod maoy kapilian sa mga sakop sa media:

- Pagyango sa tanang isulti sa administrasyon (bugtong kalainan nila sa trolls mao nga mas gamay ang ilang suweldo); o

- Pagpadayon sa naandang mga gimbuhaton bahala na kon apikihon sa administrasyon ug binastosan ug hudlaton sa trolls; o

- Paglusad og mas mamugnaon nga kampanya pagpanalipod sa kamatuoran, kasaysayan ug demokratikanhong mga institusyon ginamit ang bag-ong mga teknolohiya (apil ang TikTok) ug ang naandan nila nga katakos, kakugi, kaligdong, ug determinasyon.