Mga anino sa kagahapon
Ang paglubag sa kasaysayan isip sukaranan sa imong kandidatura usa ka butang. Pero kon ikaw na ang mopatuman sa mga balaod, nga ang pipila may labot sa mga aspeto sa kasaysayan nga gusto nimong kalimtan, laing butang.
Pananglitan, unsaon man niya pagpadayon og pangugat nga paraiso ang Pilipinas atol sa 21 ka tuig nga pagduma sa mga Marcos, nga kinahanglan man niyang ipatuman ang Proclamation No. 319 ni Presidente Rodrigo Duterte nga naghulagway sa martial law ni Marcos nga gidominahan sa pagpangyatak sa mga tawhanong katungod ug lapad nga pangurakot?
* * *
Sa di pa mapugos sa paghukom ipatuman o ibasura ba ang proklamasyon ni Duterte nga nideklarar sa Septiyembre 21 nga National Day of Protest, duna siyay mas sayo nga labad sa ulo: Ang Ninoy Aquino Day karong Agosto 21.
Di lang prokalamasyon sa presidente kon dili balaod sa Kongreso ang nagdeklarar sa Ninoy Aquino Day nga special non-working holiday sa tibuok nasud. Apurahon bang iyang mga alyado sa Kongreso pagbasura sa Republic Act No. 2956 nga gipirmahan sa laing niyang alyado nga si kanhi Presidente Gloria Macapagal Arroyo niadtong 2004?
* * *
Duna siyay laing kalibogan unya sa Pebrero 25 sa sunod tuig: Ipadayon bang holiday sa EDSA People Power Revolution? Duha ka proklamasyon ang kinahanglan niyang isalikway aron makalimtan ang EDSA:
- Ang Proclamation No. 1841 ni Arroyo sa 2009 nga nideklarar og school holiday; ug
- Ang Proclamation No. 1071 nga gipirmahan ni anhing Presidente Noynoy Aquino niadtong 2015 nga nideklarar og special non-working holiday sa tibuok nasud.
* * *
Di siya mahimong mag-ulug-ulog nga bayani si Ninoy Aquino sa way pag-ila sa maisugon niyang pakigbisog ug pagpakamatay batok sa diktadura sa iyang amahan. Di siya mahimong mangu sa pagtimaan sa holiday sa EDSA sa way pag-angkon nga ang malinawong rebolusyon nakapukan sa diktadura ug nakapalayas nila sa Malakanyang.
Mahimo nga nailad niya ang 31 milyones ka botante niadtong May 9. Pero di niya mahurot og hipos, tungod lang kay siya na ang mobanos sa pagtungkawo sa Malakanyang, ang tanang pahinumdom sa kasaysayan sa pagdaog sa mga bayani ug nagkahiusang katawhang Pilipinhon batok sa mga pagpangabuso ug pagkahubog sa gahom sa ilang pamilya.
- Latest
