Tsamba-tsamba nga internet

Pila ka semana sa wa pa ang bagyong Odette, gitanyagan ko nga mobalik og programa sa radyo. Gipasaligan ko nga hinog na ang mga teknolohiya sa komunikasyon. Nga matuman ang akong hangyo nga magpadayon pagsibya gikan sa among pinuy-anan. Makasibya ko bisan asa. Nga di kinahanglang molili sa announcer’s booth.

Gitanyagan kong pandayan og gamayng studio sa among bay. Butangan og nindot nga mikropono. Ug di mobanda sa bungbong ang akong tingog. Wa ko mosanong. Lapad ang akong kasinatian sa katandugon sa teknolohiya. Gipamatud-an ni Odette ang tanan nakong pagduda.

 * * *

Kon nakasubay ko sa among mga programa sa SibyaTV!, nahadlok kong nabiktima na sa among mga sibya nga kalit lang nikaging. May pipila gani nga naputol sa wa pa mahuman. Kay labihan ka-unstable sa internet connection. Gikan sa bisan unsang internet service provider.

Mao nga bisan wa pay Odette, may nisugyot nang i-record ang among programa. Aron makalikay sa pagtibugsok sa signal. Pero mawagtang ang kalab-as sa among mga balita ug komentaryo. Ug di na ming kabasa sa live chats ug mas mapuslanong kasayuran gikan sa mga nanan-aw.

 * * *

Pero ang kabati sa signal wa makaandam namo sa pagkawagtang sa internet dungan sa mas importanteng kuryente ug tubig ug bisan sa text ug voice calls. Kapin sa buwan kong nagbalhin-balhin og bakwet pagpangita og internet aron lang makapadayon sa SibyaTV!

Sa unang mga adlaw human sa bagyo, labihang hinaya sa signal nga ang audio niabot na sa Talisay pero ang video nasangit pa sa Mactan. Ug pipila ray nagtan-aw. Kay way internet ang dakong bahin sa Sugbo.

 * * *

May kuryente nang among bay sa bukid sa Casili, Consolacion. Pero way internet. Maong mainat ang akong bakasyon sa SibyaTV! Bisan ang pag-email ning akong lindog labihang hasola. Kay maglisod man ko sa keyboard sa telepono, ako ning gisuwat sa laptop. Pero ang data sa akong telepono di kapalihok bisan sa kinagaanang browser.

Mao ako ning gi-export isip dokumento ngadto sa telepono. Diin gi-copy and paste ngadto sa email app. Kasagaran kinahanglan pa g’yud kong mosaka sa among roof deck una makalusot. May mga higayon nga maabtan sa deadline. Kon nabasa ni nimo, nakatsamba ko.