Mas mananakod ug mas huyang
Ang Omicron mas mananakod kay sa Delta pero di sama kagrabe ang sakit nga mahatag ngadto sa mga pasyente. Mao ni ang pasiunang kasayuran nga nakuha sa mga doktor nga nag-atiman sa mga pasyente nga nataptan sa Omicron sa South Africa ug sa laing 37 ka nasud sa kalibotan.
Bisan sa pasidaan nga kuwang pa ang kasayuran ug nagkinahanglan pa og dugang mga adlaw o mga semana sa pagtuon, may pipila na ka eksperto nga niluwat og radikal nga rekomendasyon sa pagpahimus sa duha ka bentaha sa Omicron batok sa Delta.
***
Niawhag sila nga imbes pugngan himuon nga mas sayon ug mas paspas ang pagsud ug pagkatap sa Omicron variant sa mas daghang kanasuran aron nga:
- Mapapas ang mas bangis ug mas makamatay nga Delta kay ang mas mananakod nga Omicron mas abtik man nga motapot sa mas daghang pasyente sa mas mubo nga panahon; ug
- Kon ang Omicron na ang modominar, motidlom ang gidaghanon sa mga pasyente nga ma-ospital, mas mogamay ang magkinahanglan sa intensive care units (ICU) ug mas daghan ang makalingkawas gikan sa kamatayon sa COVID-19.
***
Kasagaran sa symptoms nga nahiagoman sa mga nataptan sa Omicron: Hilanat, uga nga ubo ug panington sa gabii. Masaligon ang mga espesyalista sa South Africa nga ang mild symptoms mawagtang ra human sa pila ka adlaw.
Banabana sa mga espesyalista sa South Africa: 90% sa ilang mga kaso tungod na sa Omicron; sa ato pa, napulihan nang Delta nga maoy responsable sa 99% sa tinakdanay sa Estados Unidos ug ubang kanasuran. Kon tinuod nga mas huyang ang Omicron, masaligon silang motibugsok ang mga kaso human sa duha ka semana.
***
Nadapit ang pagtagad ni Dr. Anthony Fauci, COVID-19 adviser ni US President Joe Biden, sa rekomendasyon sa mga espesyalista sa South Africa. Nipasalig siya nga kon mapamatud-an nga mas huyang ang Omicron libkason ang travel ban batok sa Africa sa mosunod nga mga adlaw.
Di na ta magpaabot og dugay sa resulta sa mga pagtuon sa Omicron. Masaligon ang World Health Organization (WHO) nga tungod sa kalibotanong pagtinabangay mas mailhan nang Omicron sud lang sa pila ka adlaw ug di na maabtan og pila ka semana.
- Latest
