Wa nang Delta, mao nay bad news

Sa pagsugod sa unang hugna sa tulo ka adlaw nga National Vaccination Drive karong adlawa (dunay ikaduhang hugna sa Disyembre 15-17), padayong gitun-ang makapahibung nga pagtibugsok sa mga kaso sa COVID-19 sa Pilipinas: Gikan sa kapin sa 20,000 kada adlaw pila ka buwan ang nilabay, wa nang kaabot og libo sa niaging upat ka sunudsunod nga adlaw.

Labihan kapaspas sa pagtidlom sa bag-ong mga kaso nga bisang Department of Health (DOH), nga kasagaran maoy mag-una-una og pasigarbo sa makadasig nga mga numero, nanagana pa pagdeklarar nga nabadlong nang tinakdanay.

 * * *

Bisan ipasikad sa higpit nga lagda sa World Health Organization (WHO), nga madeklarar lang nga nakontrolar nang tinakdanay sa COVID-19 kon ang positivity rate menos sa 5% sa 14 ka sunudsunod nga adlaw, makapangangkon na og kalamposan ang DOH.

Kay ika-15 na nga sunudsunod nga adlaw niadtong Sabado, Nobyembre 27, nga menos sa 5% ang positivity rate sa PCR tests nga gi-report sa molecular laboratories sa tibuok nasud. Gani, dinhi sa ato sa Central Visayas, 0.7% na lang ang positivity rate nga gitaho sa DOH niadtong Sabado.

 * * *

Duna nay pangagpas ang OCTA Research Group: Paspas ang paghagsa sa gidaghanon sa bag-ong mga kaso sa Central Visayas, Metro Manila, ug ubang bahin sa Pilipinas tungod sa mas taas nga panagang batok sa kagaw gikan sa duha ka grupo sa katawhan: Una, sa mas daghang natakdan sa labing grabeng sulbong sayo ning tuiga; ug ikaduha, sa kapin sa 30% sa nasudnong populasyon nga fully vaccinated na.

Ang DOH nagdumili pagsaulog. Igo lang nipahinumdom nga di pa ta angayng mokumpiyansa.

 * * *

Mas radikal ug mas katuohang katin-awan sa mga siyentipiko sa Japan: Ang Delta variant nga nakapasulbong sa mga kaso sa tibuok kalibotan nasobrahan pag-mutate nga nawad-an og katakos pagpanakod; nga mao say gitumbok nga hinungdan sa kalit nga pagkawagtang sa Severe Acute Respiratory Syndrome (SARS) sa 2003. Gipaabot nga ipagawas ang resulta sa mas hingpit nilang pagtuon karong semanaha.

Duna hinuon silay pakapin nga pasidaan: Sa mga buwan nga nidominar ang Delta sa Japan, Pilipinas, ug ubang kanasuran, wa kasud ang ubang variants. Karong wa nang Delta, mahimong makapatuyang ang mas grabeng bag-ong variants. Sama sa Omicron.