Pagtahan sa kaluya sa pamakuna

Padayong nagdumili ang administrasyon ni Presidente Rodrigo Duterte sa pag-angkon sa seryusong problema sa kaluya sa pagpamakuna. Bisan sa nagkadako nga kahigayonan nga mausik ang binilyon ka pesos nga balor sa mga bakuna nga mohupas na karong tuiga tungod sa kamingaw sa vaccination sites, wa silay gihimo.

Gawas sa pagpasidaan sa mga mayor nga naglisod sa pagkumbinser sa ilang katawhan sa pagpabakuna nga kuhaon ang natanggong nga mga bakuna ug ibalhin sa laing mga lugar. Ug gawas sa pagsige og awhag nila sa pagpangita og mga paagi nga mopaspas ang pamakuna.

 * * *

Di hinuon monopoliya sa Pilipinas kining problemaha. Pero ang ubang mga nasud nakakita na og mga paagi sa pagbakuna sa igong gidaghanon sa populasyon nga makahatag nila og panagang sa kagaw aron makapangabli na pagbalik sa ekonomiya.

Duha ka kampanya ang ilang gilusad: Ang gobyerno nihigpit sa mga lagda sa pagpamakuna sa mga sektor nga kinahanglan gyong bakunahan; ug ang gobyerno ug pribadong sektor nagtinabangay paghimong mas madanihon sa mga insentibo--sama sa dagkong premyo ug makabuhong nga mga pribilehiyo--aron pagdasig sa katawhan nga magpabakuna sa labing dali nga panahon.

 * * *

Tungod tingali sa pagdumili pag-atubang sa problema, taphaw ang mga lakang sa pagdapit sa katawhan sa pagpabakuna:

• Nagkasungi ang mga lagda sa paghatag og pabor sa mga nabakunahan na;

• May mga opisyal sa gobyerno nga nipalabi sa pagpanalipod sa katungod sa di pagpabakuna kay sa pagpasabot sa kadinalian sa panginahanglan sa pagpabakuna; ug

• Tungod tingali sa kataphaw sa direksiyon sa gobyerno, nagluya sab ang mga promo nga gitanyag sa pribadong mga kompaniya.

 * * *

Giunsa pagkumbinser ang taga Hong Kong sa pagpabakuna: Mga bola nga minilyon ka dolyar ang cash prizes ug ubang mga premyo sama sa Mercedes Benz, Tesla, Rolex, gold bars, apartments, flights, train trips, usa ka tuig nga puyo sa hotels sa bisan asang bahina sa kalibotan, shopping vouchers ug discounts, credit card spending rewards, shares of stocks, insurance, matrikula, mahalong mga bino, pases sa sine, iPhones ug daghan pang uban.

Unsay gihimo sa Pilipinas? Raffle sa DOH ug Pagcor nga lisod pag-apil ug tihik ang premyo; vaccination certificate nga siyam-siyaman una makuha; ug 10% nga diskuwento sa pipila ka kan-anan ug gasoline stations.