Nganong atong pilion ang local rice
Nakakuha ko og mapuslanon nga kasayuran gikan sa negosyante og bugas humay sa Sugbo nga parsiyal nga makapasabot sa suplay ug presyo sa bugas humay sa kamerkadohan, unsay labing kinaham sa mga konsumidor ug ilang mga implikasyon sa lokal nga mga mag-uuma:
• Nagbaha ang imported rice sa kamerkadohan ug mga tindahan;
• Mas himalitan ang imported rice kay mas barato ug mas puti kay sa lokal nga bugas; ug
• Gilabay-labayan lang sa mga konsumidor ang lokal nga bugas humay kay mas mahal kay sa imported rice ug di sama kaputi.
* * *
Sa iyang post sa Facebook, nipasabot ang negosyanteng si Jay-Ann Garcia nga ang mas maayong kalidad sa imported rice nanukad sa mas daghang suporta nga nadawat sa mga mag-uuma sa ubang kanasuran gikan sa ilang gobyerno: Subsidized ang ilang binhi, abuno, makinarya sa pagtanom ug pag-ani ug bisan sa paggaling.
Nipadayag siya og kasubo nga ang lokal nga mga mag-uuma gipasagdan sa gobyerno ug kinahanglang mangutang para sa binhi, abuno, makinarya (kasagaran nagsalig sa mga kabaw) ug human sa ani paliton lang sa mga komprador og barato ang tipasi.
* * *
Maong niawhag si Jay-Ann sa mga konsumidor nga dako og ikatabang sa mga mag-uuma kon mamalit sila og lokal nga bugas humay. Gihatagan ko niya sa lista sa pipila ka brands: Central RC480 Crop; Ifugao Sl-8H Crop; Mindoro RC216 Crop; P. Berry RC160 Crop; ug Aubrey RC218 Crop.
Tungod sa kadaghan sa local brands, nisugyot siya nga tan-awon sa kilid sa sako ang mosunod nga generic names sa lokal nga bugas humay: Angelica; Ifugao; Mindoro; Dinurado; Bigante; Sinandomeng; ug Maharlika.
* * *
Gipahibawo sab ko ni Jay-Ann nga dunay mga bugas humay nga gipatuo sa mga mamaligyaay nga lokal pero ang tinuod imported diay. Giila niya ang pipila sa labing popular nga brands: Ganador, Lion Ivory, Conchita, Jaguar, Chef’s Choice, Princess Mia, Princess Bea, Kohaku, King, ug Yangchow.
Nihangyo si Jay-Ann sa mga konsumidor nga tilawan ang lokal nga bugas humay kay: Mas humot, mas bag-o (kay wa mag-agi og pila ka buwan nga biyahe sa kadagatan); ug makatabang sa mga negosyante nga namalit gikan sa lokal nga mga mag-uuma bisan nagbaha ang mas baratong imported rice.
- Latest
