Hinaot way malisya ang COVID Kaya
Kada adlaw sukad sa pag-ulbo sa pandemya dul-an sa duha ka tuig nang nilabay nipagawas ang Department of Health (DOH) kada alas-4 sa hapon sa inadlaw nilang ihap sa bag-ong mga kaso sa COVID-19. May mga adlaw nga nauwahi pero mas daghang adlaw nga natuman ang schedule.
Hangtod sa niaging semana. Mas daghan nang langay. Gani sa niaging tulo na ka adlaw wa na maapil ang labing bag-ong ihap sa mga nangamatay. Ilang gibasol ang COVID Kaya, ang digital platform pagtipig ug pagduma sa tanang kasayuran sa COVID-19 sa Pilipinas.
* * *
Kasagarang problema sa COVID Kaya nga gitug-an sa DOH mao ang pagpalyar sa pag-ihap sa bag-ong mga kaso. Nipasabot ang DOH nga ang mga kaso nga di maihap tungod sa kakulian ilang giapil sa ihap sa sunod adlaw.
Wa silay gihatag nga kasayuran unsay problema sa COVID Kaya. Nauwahi bang report sa mga ospital? Nasangit bang kasayuran sa DOH regional offices? Nahimut-okan bang sistema tungod sa paspas nga sulbong sa mga kaso sa tibuok nasud karong bag-o? Kon di mapasabot ang problema di kalikayan ang pagtumaw sa dugang pagduda.
* * *
Labing dakong buslot sa COVID Kaya sukad sa sinugdanan mao ang pag-ihap sa mga nangamatay. O kapakyas sa pag-ihap. Hapit kada adlaw nipahibawo ang DOH nga dunay nangamatay sa nangaging mga buwan nga ilang naihap nga recoveries pero nahibaw-an nga patay diay sa dugang pakisusi.
Sayop ba lang sa desinyo sa ilang sistema? Nga mas ganahang moihap sa recoveries kay sa nangamatay? Tsamba ba lang nga nahunong ang pag-ihap sa mga minatay human nisulbong ang gidaghanon sa nangamatay sa nangaging mga adlaw?
* * *
Ang COVID Kaya gibase sa application sa World Health Organization nga giumol sa software developers pag-ihap sa mga kaso sa TB sa Pilipinas sa wa pang pandemya. Gidalidali pag-usab aron makatubag sa panginahanglan sa information management sa COVID-19.
Pagsugod pa lang nalumos nang daan ang sistema sa nagbuntaog nang kasayuran sa contact tracing, testing ug quarantine sa unang mga plataporma sa local government units ug nasudnong mga ahensiya. Tingali lisod lang dumalahon ang minilyon ka detalye sa pandemya. O di lang kamao ang mga tagduma. O gisagolan og malisya ang pagduma sa mga numero.
- Latest
