Anak ug amahan maoy problema
Ang anak maoy labing isog nga nisupak sa amahan. Niingon ang amahan nga di angayng magpili og bakuna. Nisuway man gani pagbuta sa mga magpabakuna unsay bakuna nga ihatag nila hangtod nga gipahinumdoman nga ang batakang katungod sa mga pasyente nga pahibaw-on unsay tambal nga idapat nila.
Ang anak wa mag-inusara. Daghang pareha og sentimento niya pero way kaisog nga moprotesta. Hapit nang piniliay ug ang bendisyon sa amahan importante para sa ilang politikanhong mga ambisyon. Maong nipili sa pagluom. Pero sa tago niabiba dihang ang anak nahimo nilang tigpamaba.
***
Nag-atang ang ubang mayor unsaon pagsabon ni Presidente Duterte ang iyang anak, si Davao City Mayor Sara Carpio. Kinsa niawhag sa Inter-Agency Task Force (IATF) paghunong paghatod og mga bakuna sa Sinovac ug Sinopharm kay ganahan ang taga Davao sa ubang brands.
Nakugang ang ubang mayor nga way pangasaba nga nahitabo. Gipadad-an hinuon ang Davao City og dugang bakuna sa Pfizer gahapon. Karon nakumbinser na sila nga ang mga lagda para ra sa mga di kadugo. Magpabilin hinuong tak-om kay di kapaabot og samang pagtagad kon mangahas sab pagreklamo.
***
Way ganahang moangkon sa problema. Pero ang nahitabo sa Davao City mopatin-aw sa kaluya sa pagpamakuna bisan nagsobra nang suplay sa nasud. Katunga rang inadlawng pamakuna karong buwana kon ikumparar sa kapin sa 700,000 nga nabakunahan sa pipila ka adlaw sa niaging buwan.
Ang tinuod mao nga nagmingaw ang vaccination sites sa mga adlaw nga Sinovac ang gipamakuna. Samtang naghuot sa mga adlaw nga ubang brands ang gitanyag.
***
Ang amahan maoy problema. Nideklarar nga palabihon niyang mga bakuna sa China ug Russia kay ang ubang kanasuran nagpaburot sa ginansiya. Tuod man, Sinovac ug Sputnik V ang unang gipakompra. Pero gipasanginlang Sinovac nga di sama ka-epektibo ug niungot ang produksiyon sa Sputnik.
Ang sulbad, kay di na man mabakwi ang sayop sa taphawng liderato, di ang pag-ulug-ulog sa anak ug pagsabon sa ubang mangreklamo. Kon dili ang pagpasabot sa katawhan nga napamatud-an ang kaluwas ug ka-epektibo sa tanang bakuna (ang World Health Organization niaprobar sa Sinovac ug Sinopharm). Ug tungod sa kanihit sa kalibotanong suplay ang labing epektibong bakuna mao gihapong natusok na sa ilang bukton.
- Latest
