Pagsagol sa pataka ug pangurakot
Hangtod karon, usa ka semana na human nabisto ang kasayuran, wa pa g’yud ikapasabot ni Health Secretary Francisco Duque III nganong bisan sa dinaliang panginahanglan sa mas daghan nga PCR testing, gilimitahan nila ang testing nga niresulta sa pag-expire sa P550 milyones nga balor sa test kits sa niaging tuig.
Di ni mahimong tubagon lang og drama-drama ni Duque nga wa na siyay tarung nga kinatulgan tungod sa mga pasangil sa kahiwian, di na siyang kapasalipod sa bastos nga mga panginsulto ni Presidente Rodrigo Duterte sa padayong pagdupa niya, kay opisyal nga dokumento sa iyang ahensiya ang nimatuod sa binuang.
* * *
Pag-angkon sa sayop ug pagpangayo og pasaylo na lay kapilian ni Duque human nakuha sa Senate Blue Ribbon Committee ang kopya sa suwat ni Health Assistant Secretary Santiago ngadto ni Lloyd Christopher Lao sa Procurement Service sa Department of Budget and Management (PS-DBM) niadtong Disyembre 7, 2020 paglangay sa paghatod sa test kits gikan sa Pharmally Pharmaceutical Corp. kay ang mga laboratoryo naka-konsumo lang og 1,000 ngadto sa 1,500 tests kada buwan:
"The demand may not increase based on our forecast. As of this writing, we still have enough BGI testing kits until March. The proposed delivery schedule will prevent the repeat of the past scenario where a large number of stored BGI kits expired."
* * *
Kinsa may nidesidir nga limitahan ang tests og 1,500 kada buwan? Si Duque, mga heneral, mga politiko, o mga negosyante sa gabinete? Unsa may rason? Pagdaginot o pagpabiling ubos sa numero sa bag-ong mga kaso?
Tinihik bang testing ang hinungdan nganong wa kapugngi ang pagsulbong sa mga kaso niadtong Marso ug Abril karong tuiga?
* * *
Ang suwat sa DOH sa PS-DBM mohimakak sa lusot ni testing czar Vince Dizon nga di kadugangang PCR testing kay kuwang sa kuwarta: Minilyon ka pesos ang nausik sa nadugtang test kits.
Nahadlok g’yuds tingaling mga naglibot ni Presidente Duterte nga mosulbong ang maihap nga mga kaso kon palapdang PCR testing. Sama sa naandan ang tumoy ra ilang ilong ang nakit-an. Wa kalantaw sa mas dakong kaayuhan: Ang mas daghang tests makatultol sa tinakdanay aron mabadlong sa di pa makaigo sa mas daghan.
- Latest
