Pagdupa sa bangis nga krimen
Sawaya bisan unsa ang mga imbestigasyon sa Senate Blue Ribbon Committee, ug dasonan nakong imong pagtulisok sa mga senador nga mas interesado sa ilang personal nga mga interes kay sa kamatuoran, pero di nimo sila mapasanginlan nga mga inutil sa pagsusi sa mga transaksiyon sa Pharmally Pharmaceutical Corporation.
Bisan sa mga panghudlat, panginsulto ug pagbinastos ni Presidente Rodrigo Duterte, o tungod ba kaha sa iyang personal nga mga atake, nabisto sa mga senador ang mga tinagoang transaksiyon nga di gyod unta nato mahibaw-an kon managhigala pang duha ka sanga sa gobyerno.
* * *
Kinabag-ohan nga nabisto, nga nakahimo sa kinatibuk-ang transaksiyon nga grabeng krimen sa pandemya, maong pag-expire sa P550 milyones nga balor sa test kits kay:
Gidawat sa Procurement Service sa Department of Budget and Management (PS-DBM) ang kits sa Pharmally nga nakalapas sa mga lagda sa Department of Health (DOH); ug
Nagtinihik ang gobyerno sa PCR testing bisan sa tambag sa kalibotanong mga eksperto nga lapad nga testing ray makatultol ug makabadlong dayon sa tinakdanay sa Covid-19 sa di pa mokatap ang mas daghan.
* * *
Kon gituman pa lang unta sa PS-DBM ang gitakda sa DOH nga shelf life sa test kits nga 2 ngadto sa 3 ka tuig, imbes gidawat ang kits sa Pharmally nga unom ka buwan ray lahutay, di unta mo-expire ang dul-an sa tunga sa milyon ka tests.
Kon gipagawas pa lang unta dayon sa DOH ang test kits ngadto sa mga laboratoryo, gawas nga way mausik maluwas unta ang kaliboan ka pasyente sa Covid-19 gikan sa kamatayon.
* * *
Gawas sa tanang depekto sa test kits sa Pharmally, nga nagsilbing ahente nga tigpatong sa presyo nga nanguha ra gikan ni bisan kinsang supplier, hapit nadoble ang ilang presyo nga P1,400 kada test kon ikumparar sa kits nga napalit sa Philippine Red Cross sa mas kasaligang supplier sa samang higayon sa niaging tuig nga tag P750 ra kada test.
Daghang salamat sa kakutikutihan sa mga senador, nasabtan na nganong nagpapating si Presidente Duterte pagpanalipod sa eskandalo--kay iyang mga tinudlo ang nagpalusot ug iyang gipaborang mga negosyante ang niburot. Bangis nang daan ang pagpanguwarta taliwa sa pandemya, mas pintas pa gyong pagdupa sa anomaliya.
- Latest
