Pagkabanhaw sa timaan sa diktadura

Usa sa mga protesta batok sa diktadurang Marcos nga akong naapilan samtang gipatuman pang martial law mao ang 39 ka kilometro nga martsa gikan sa Carcar paingon sa Cebu City. Gabii na ming niabot sa Barangay San Nicolas diin gisikop sa kapolisan ang mga nag-una sa panon.

Gawas sa naposasan nga mga nangu sa kalihokan nagkatibuwaag nga mga tsinelas ray nasikop sa mga polis kay kasagaran namo niipon sa nagpadayong Santos nga Misa sa simbahan. Di sama kamapanagan-on ang diktadura sa mas isog nga mga nakigbisog sama ni Padre Rudy Romano.

 * * *

Sakit sab ang kasinatian sa martial law sa mga malinawon nga nanginabuhi pero naligsan sa mga nagpahimus sa diktadura. Di nako makalimtan ang istorya sa duha ka managsuong negosyante kansang demalas mao nga ang gikasungi nila may kailang opisyal sa Philippine Constabulary (PC).

Gipriso sila sa Camp Sotero Cabahug kay gisuwat ang ilang ngan sa photocopy sa Arrest, Search and Seizure Order (ASSO) nga pirmado nang daan ni kanhi Defense Minister Juan Pone Enrile. Way kasong gipasaka batok nila maong wa kapiyansa para sa temporaryo nilang kagawasan.

 * * *

Giingnan sa mga guwardiya sa ilang selda nga maghuwat unsay sunod nga himuon sa ilang atraso ug sa padrinong opisyal. Kay gawas lang kon mahusay dayon ang ilang away mahimong mas dugay pa sila nga matanggong.

Nakalingkawas lang ang managsuon kay ang ilang abogado dunay iyang kaugalingon nga koneksiyon: Abogado sab siya sa labing sinaligan ni anhing Presidente Ferdinand Marcos sa Sugbo nga si kanhi gobernador, karon kongresista, Eduardo Gullas.

 * * *

Sa pagtimaan sa ika-49 nga anibersaryo sa martial law ni Marcos karong adlawa, nabanhaw ang mga timaan sa pangabuso sa mga nagtungkawon sa gahom: Paglubag sa mga lagda pagpabor sa ilang mga suod ug paggukod sa ilang mga kaatbang, o sa kaatbang sa ilang mga alyado, ug mga palusot nga makawaldas sa atong buhis ug makapaburot sa pribadong mga bolsa.

Maong naka-gordong mga negosyanteng sama nilang Michael Yang ug Dennis Uy nga kamaong mogamit sa saktong mga koneksiyon. Ug maong naapiking mga nangahas pagsukol sama nilang Senador Leila de Lima ug kanhi chief justice Maria Lourdes Sereno. Atong konsuylo maong kasayuran unsay gidangatan sa diktadura.