Madakpan lang ang presidente kon...

Kon nagpaabot ka nga ipadakop dayon sa International Criminal Court (ICC) si Presidente Rodrigo Duterte human giaprobahan ang pormal nga imbestigasyon sa pasangil sa crimes against humanity batok niya, lugwayi ang imong pailob pinaagi sa pagsubay sa mga lagda sa ICC:

• Si ICC Prosecutor Karim Khan, nga kapin sa duha ka buwan pa lang sa katungdanan, magpadala og mga imbestigador ug prosecutors sa Pilipinas pagkolekta og mga ebidensiya ug pagsukitsukit sa mga gipasanginlan, mga biktima ug mga saksi;

• Ilhon sa mga imbestigador ang labing grabeng mga insidente ug ang labing responsable; ug

• Kon makumbinser si Khan nga may igong ebidensiya, awhagon niyang mga huwes pagpadakop sa presidente ug ubang gipasanginlan.

 * * *

Bisan kon maluwatan nang warrant of arrest, lisod ang pagdakop sa mga sinumbong kay:

• Di mahitabo nga ipadakop ni Presidente Duterte ang iyang kaugalingon ug mga sinaligan nga gilambigit sa lapad nga pinatyanay sa Davao City ug sa tibuok nasud;

• Bisan sa desisyon sa atong Korte Suprema nga obligado ang Pilipinas nga motabang sa imbestigasyon sa ICC, di mapatuman sa lokal nga mga hukmanan ang ICC arrest warrant.

 * * *

Sa di pa maluya, angay kang pahibaw-on nga mahimo pa nga mapadakop sa ICC si Presidente Duterte kon:

• Mogawas siya sa Pilipinas ug moduaw, o bisan moagi lang, sa mga nasud nga sakop sa ICC;

• Tabangan sa United Nations Security Council, o Estados Unidos ug ubang kanasuran, ang ICC; ug

• Mapilde si Duterte ug iyang mga alyado sa piniliay sunod tuig.

 * * *

Bisan kon di dayon madakpan padayon nga mahasol si Presidente Duterte kay ang arrest warrant magpabilin hangtod nga buhi pa siya. Kay maneguro ang ICC nga motunga siya sa mga husay sa kaso, di niya babagan ang imbestigasyon ug di makapadayon paghimo sa bangis nga mga krimen nga gipasangil batok niya.

Kon kumbinsido sa iyang kaugalingon nga mga pangangkon sa kahuyang sa mga ebidensiya batok niya ug sa legalidad sa iyang gisugo, gisugo ug gipatuman nga laktod nga mga patay atol sa pagduma sa Davao ug Pilipinas, mahimo siyang mosurender sa ICC aron di na ipadakop. Nahibawo hinuon tang tanan nga mahitabo lang kana kon madutlan na sa sukmat sa iyang tanlag.