Patuyang nga pagdupa ni Yang

Palihug subaya ang nag-usab-usab nga panagang sa pamunoan ni Presidente Rodrigo Duterte sa mga personalidad nga gilambigit sa nangalisbo nga mga transaksiyon sa pandemya:

• Di kawatan si Health Secretary Francisco Duque, kasarangang opisyal sa PS-DBM si Lloyd Christopher Lao, ug way labot si Michael Yang;

• Dihang nabistong si Lao pangabaga ni Senador Bong Go sa PMS ug abogado ni Duterte sa Davao, giawhag ni Go si Duque pag-resign; ug

• Dihang nabantang nga si Yang ang nagpalusot sa transaksiyon, giila siya sa presidente nga iyang koneksiyon sa dagkong negosyante sa China.

 * * *

Nagkalainlain sab ang ilang panalipod sa mga lagda sa mga transaksiyon:

• Nasubay ang tanang lagda sa pagbalhin sa P42 bilyones sa DOH ngadto sa PS-DBM ug sa pagpamalit sa PS-DBM gikan sa Pharmally Pharmaceuticals Corp. ug ubang suppliers; pero

• Dihang nabisto nga gimando sa balaod ang MOA sa di pa mabalhin ang kuwarta sa usa ka ahensiya ngadto sa lain ug nga way nahimong subasta, nidupa ang presidente nga siya ang nagsugo nilang Duque ug kaubanan nga laktawan ang subasta tungod sa kadinalian sa panginahanglan sa PPEs ug medical supplies.

 * * *

Managlahi sang ilang postura sa kataas sa presyo:

• Mas mahal kay nihit ang kalibotanong suplay sa PPEs ug ubang medical supplies sa niaging tuig;

• Dihang nabisto nga ubos ang presyo sa local manufacturers ug mas baratong PPEs ang napalit sa pribadong mga kompaniya, way igong puhonan ang Pharmally ug Philippine Air Force ug Navy ang naghakot sa ilang supplies gikan sa China, niinsistir ang presidente nga ang importante mao nga nahatod ang tanang medical supplies.

 * * *

Duha ray among nakit-ang posibleng rason sa way kukauwaw nga balitok sa pamunoang Duterte sa ?14 bilyones nga mga transaksiyon:

• Una, masaligon ang presidente nga ang iyang popularidad ug ang nasudnong kahadlok sa mga patay ug sa bangis niyang mga hudlat makapugos sa katawhan sa pagdawat sa tanan niyang pangabuso ug pakauwaw; ug

• Ikaduha, nagyagaw nang iyang panghunahuna, nga nakatakod sa iyang pamunoan kay mag-agad ra man unsay masud sa iyang bakukang, nga gihukas nang tanang salimbong sa pagpaka aron ingnon ug gipamugos ang tinuod niyang pagtuo: Nga labaw siya sa balaod ug nga ang bisan unsa niyang isulti maoy balaod.