Drive-thru booster sa PUV drivers, aarangkada na sa Maynila

MANILA, Philippines — Inumpisahan na ngayong umaga ang drive-thru booster vaccination sa Bagong Ospital ng Maynila bilang bahagi ng pagpapalakas sa ‘vaccination drive’ ng siyudad.

Kabilang sa mga maaaring pumila at magpabakuna ng booster ay ang mga jeepney driver, tricycle driver, sidecar boy, delivery van driver, at taxi drivers.

Sinabi ni Manila City Mayor Isko Moreno na maaari ring isama ng mga nasabing drayber ang kanilang pamilya upang mabakunahan na rin sila ng booster shot na dagdag proteksyon kontra COVID-19.

Nagsimula ang bakunahan sa Bagong Ospital ng Maynila dakong alas-8 ng umaga hanggang alas-5 ng hapon. Naglaaan ang Manila City Health Department ng 1,000 doses ng iba’t ibang brand ng bakuna para sa mga tsuper.

Samantala, tuluy-tuloy pa rin ang 24/7 drive-thru booster vaccination caravan sa Quirino Grandstand para sa 4-wheels habang mga motorcycle riders at bikers naman ang binabakunahan sa Kartilya ng Katipunan sa tabi ng Manila City Hall.

Pinaalalahanan naman ang mga pupunta sa mga nasabing vaccination sites na ipakita ang QR code na nakuha sa pagpaparehistro sa Manila Vaccination website para sa verification, vaccination card at ID.