Guiao susulitin ang break para palakasin ang E-Painters
MANILA, Philippines — Sa Oktubre pa sisimulan ang 48th season ng Philippine Basketball Association (PBA) kaya may sapat na panahon pa ang Rain or Shine para magplano.
Maagang napatalsik ang Elasto Painters sa kasalukuyang 2023 PBA Governors’ Cup mula sa tinapos na 2-9 kartada dahil sa problema sa mga nakuhang imports.
“Siguro ito iyong pagkakataon na kung ano iyong puwedeng i-improve sa team at lahat ng puwede naming adjustment gagawin namin sa period na ito,” ani head coach Yeng Guiao.
Unang ipinarada ng Rain or Shine si balik-import Michael Qualls na hindi sila nabigyan ng panalo bago ipalit si Greg Smith II.
Matapos ilagay ang Elasto Painters sa win column ay hindi ulit nakapaglaro si Smith dahil sa kawalan ng Letter of Clearance mula sa mother ball club sa Dominican Republic.
Nagkaroon siya ng pulled hamstring at hindi na natulungan ang tropa ni Guiao.
Hindi naman nakapasa ang kanilang kinuhang import na si Jordan Tolbert sa height limit na 6-foot-6.
“We will not make it as an excuse, pero naging problema namin unang-una iyong import namin,” sabi ni Guiao. “We did not do a good job of scouting an import who can fit our system, iyong talagang puwede namin na makasama in the long term.”
Sa PBA Rookie Draft sa Setyembre ay may dalawang mapipili ang Rain or Shine sa first round.
- Latest
