Thurman tuturuan ng leksyon ni Pacquiao

MANILA, Philippines — Patatahimikin ni eight-division world champion Manny Pacquiao ang ma­tabil na dila ni undefeated American pug Keith Thurman sa kanilang nakatakdang unification bout sa Hulyo 20 (Hulyo 21) sa MGM Grand Garden Arena sa Las Vegas, Nevada.

Nais ni Pacquiao na turuan ng leksiyon si Thurman na paulit-ulit na nagbibitaw ng maaanghang na salita.

Sa unang araw ng press tour, hindi pinapatulan ni Pacquiao ang mga patutsada ni Thurman.

Subalit bumanat na rin ang Pinoy champion sa ikalawang araw ng press tour sa California.

Alam ni Pacquiao na hindi uubra si Thurman sa kanyang lakas.

Kabisado nito ang estilo ni Thurman kaya’t walang nakikitang problema si Pacquiao.

Sanay na si Pacquiao sa mga trash talking bago ang laban. Ilang madaldal na boksingero na rin ang pinatahimik ng Pambansang Kamao.

“I’ve seen (Thurman’s) style and I know his techniques, and I know I’ll win. Talking trash before the fight, saying he’ll send me to retirement. I want to give him a lesson,” ani Pacquiao sa panayam ng Los Angeles Times.

Makailang ulit inihayag ni Thurman na pagreretiruhin nito si Pacquiao.

“If you understand bo­xing history, you know that times change. Boxing is in a new era. Come July 20, Pacquiao will disappear. He’ll always be remembered in the sport, but I’m doing to Pacquiao what he did to Oscar De La Hoya. I’m excited to be the guy who shows Manny Pacquiao where the exit is,” ani Thurman.

Subalit iginit ni Pacquiao na walang sinuman ang makapag-uutos sa kanya kung kailan ito magreretiro.

“He’s saying things before we fight, but I will send a message to him in the ring about exactly who he’s fighting; he will come to know that. No man can dictate when I’m going to retire,” ani Pacquiao.

Sa kanyang mahigit dalawang dekada sa boksing, wala rin aniya itong kinatatakutan.

Kailangan aniyang matuto si Thurman na rumespeto sa mas nakatatanda sa kanya.

“I’ve been in this sport two decades. Nobody intimidates me. Thurman should respect his elders, especially this elder,” dagdag ni Pacquiao.

Dahil sa maaanghang na salita ni Thurman, mas nagiging inspirado si Pacquiao na magsanay para dungisan ang rekord ng American fighter.