Mano-mano nga ihap
Ambot unsay mga ebidensiya ni outgoing Governor Gwen Garcia sa pasangil nga ang automated counting machines (ACMs) sa tanang presinto sa probinsiya sa eleksiyon niadtong Mayo 12 gimaniobra aron pagbalhin sa iyang mga boto ngadto ni Governor-elect Pam Baricuatro.
Wala siya magtagad sa pagpakita sa mga Sugbuanon sa mga sukaranan sa giingong tikas. Bisan si Baricuatro, nga nakadawat na og kopya sa election protest kay gipangayoan na man og tubag sa Commission on Elections (Comelec), wala mopalili sa mga detalye sa mga pasangil ni Garcia ug sa ilang tubag.
***
Pero ang pasiunang resulta sa nagpadayong mano-mano nga ihap sa mga balota sa pipila ka presinto sa Sugbo ug sa tibuok nasud dili maayong balita para ni Garcia. Nakaplagan sa random manual audit (RMA) sa Comelec nga 99.997% ang accuracy rate sa ACMs.
Ang resulta sa RMA magamit ni Baricuatro sa pagkumbinser sa Comelec nga ang tanang 1,107,924 niya ka boto, nga naihap sa opisyal nga iskutenyo, para g’yud niya ug nga ang tanang 765,051 ka boto nga nakuha ni Garcia para g’yud ni Garcia.
***
Ugma, Lunes, mahuman ang RMA. Sa akong pagsuwat ini, 95% pa sa mga balota ang naihap (723 sa 762 ka mga presinto). Wala ipahibawo sa Comelec asang mga lugara nahimutang ang 39 ka presinto nga wala pa maihap.
Ubos sa Automated Election System Act (Republic Act No. 8436), usa ka presinto sa kada distrito ang ipaubos sa RMA. Sa ato pa, tagsa sa pito ka distrito sa probinsiya ug lone district sa Mandaue.
***
Dili kapasangil si Garcia nga gimaniobra ang RMA:
•Gipili ang mga distrito sa electronic raffle sa Comelec nga gisaksihan sa citizens’ arm groups, politikanhong mga partido ug media;
•Nitambong sa RMA ang mga representante sa citizens’ arm groups, politikanhong mga partido (apil nang One Cebu ni Garcia) ug media;
•Gisugdan ang RMA niadtong Mayo 14 sa RMA Center sa Citadines Bay sa Pasig, Lunes hangtod Domingo, alas-8 sa buntag hangtod alas-6 sa gabii; ug
•Gi-livestream ang RMA sa Comelec Facebook Page, YouTube Channel ug TikTok Account, ug dunay live viewing room sa RMA Center para sa publiko.
- Latest
