Sekreto ni Gwen

Gitug-anan ni outgoing Governor Gwen Garcia ang 281 ka gagmayng mga negosyante nga iyang gitapok sa Kapitolyo sa niaging semana aron pagdawat og tabang sa programang ‘Sugbo Negosyo’ og mga detalye sa iyang kinabuhi nga, niya pa, wala mahibaw-i bisan sa sinaligang mga opisyal sa Kapitolyo.

Ambot tungod ba kaha kay mapupos nang iyang termino sa kataposan ning buwana. Ug nabalaka nga wala nay interesado, o wala nay mapugos sa pagpaminaw, sa iyang istorya. Pero nagduda ko nga, bisan sa pagkumpisal sa iyang mga sekreto, duna gihapoy kasayuran nga gitipigan.

Niasoy si Garcia nga nagsugod siya og negosyo isip ahente sa Petron gasoline station sa Ormoc tinabangan sa puhonan gikan sa iyang ugangan. Dayon nahimo siyang dealer sa Gasul ginamit ang puhonan sa iyang apohan.

Gi-detalye sab nga tungod sa daghang kahigayonan nga gitanyag sa PASAR Corp. sa Isabel, Leyte, napugos og sugod bisan walay nakamaohan sa janitorial services ug security agency. Ug nakatukod sab og pribadong mga pantalan. Ambot tinuyo ba o nakalimtan lang wala siya maghisgot giunsa sa pagsugod ang kontrobersiyal nilang negosyo sa bas ug graba.

Gisugilon niya ang kalisod sa pagbayad daan og cash sa dili pa hatdan og dugang igbabaligya. Nihinumdom nga gisugo ang iyang mga anak, apil na si karon Tourism Secretary Christina Garcia Frasco, sa pagkolekta sa ilang halin inig gawas nila sa eskuylahan kada hapon aron ma-deposito dayon sa bangko.

Naghisgot nga nagpatabang sa bangko pagpadako sa iyang negosyo. Ambot tinuyo ba o nataligam-an lang wala hisguti nganong gikinahanglang Korte Suprema pay maningil sa 29 anyos niyang utang.

Kay nakabuylo na man, iya sang gi-istorya nga tungod sa kagubaon sa dalan gikan sa Ormoc paingon sa Isabel nag-pambot paghatod sa mga kargamento paingon sa PASAR sa gitakdang panahon. Kausa nga nagabhian sa pagpauli, nahagbong ang ilang trak kay nakatulog ang drayber. Atol sa aksidente, nabali ang iyang ilong. Ug sa hinay nga tingog, sa tuno nga nangiliyupo nga tuohan, nipuno nga mao toy hinungdan nga nitaas ang iyang ilong.

Ambot ninyo pero akong nabatyagan nga bisan sa akto sa pagpakigsawo sa iyang mga tinagoan si Garcia dunay katakos sa pagpili unsa ray itug-an.