Kabug-at sa paugat ni Gwen
Ambot unsay nahitabo sa mayoriya sa mga sakop sa Cebu Provincial Board. Human nila gi-boykot ang special session sa pagtuki sa P1.2 bilyones nga supplemental budget para ni Vice Governor-elect Glenn Soco, giisnab na sab nila ang tigom nga gipatawag ni outgoing Governor Gwen Garcia sa Capitol Social Hall.
Samtang nitambong ang mayoriya sa mga mayor, tulo ra ka board members ang nipakita niadtong Martes sa hapon. Mas gamay kay sa niapil sa dinaliang sesyon niadtong Mayo 21. Nagpadayon pa ba sa ilang bakasyon human sa kampanya sa eleksiyon?
-o0o-
Pero dunay quorum ang duha ka sunudsunod nilang regular sessions niadtong Mayo 26 ug Hunyo 2. Nakalimtan ba lang ang mga palusot sa mga biyahe sa ubang kanasuran ug official leave? O nanambong kay wala na maapil sa agenda ang supplemental budget?
Unom ray nitunga sa special session (bisan gi-certify ni Garcia nga urgent ang budget ordinance): Soco, Mike Villamor, Red Duterte, Kerrie Shimura, Tata Corominas-Toribio ug outgoing Vice Governor Junjun Davide. Niadtong Martes, sila na lang Soco, Villamor ug Duterte ang nitungha. Bisan si Davide wala na magpakita.
-o0o-
Human gipahibawo nga nipasaka siya og election protest sa Comelec, nisurender si Garcia sa budget. Niangkon nga nabasura na human giuli sa board members ang budget.
Nipasidaan hinuon si outgoing Board Member Jiembo Borgonia, ang unang nideklarar og pagsupak sa supplemental budget, nga mahimong makalusot ang sugo ni Garcia pinaagi sa pagbutang sa “other matters” sa ilang agenda o pagbuakbuak sa P1.2 bilyones sa umaabot nga mga sesyon sa dili pang Hunyo 30.
-o0o-
Laing wala igkita atol sa tigom niadtong Martes mao ang kadasig sa mga nanambong. Walay timaan sa hiniusang kahimangod human nipasangil si Garcia nga gitikasan siya sa automated counting machines.
Nabantang ang kaminghoy sa mga nanambong. Pagsugod mora silag nangandam nga sabonan og kasaba nganong wala kapadaog ni Garcia sa ilang mga teritoryo. Bisan gipasaligan ni Garcia nga wala siya mobasol nila, wala huwasi. Ilang bayhon gibug-atan sa palas-unon sa sunod nga tulo ka tuig: Sa pabiling pagdumili ni Garcia pag-angkon og kapildehan; ug sa padayong paggamit ni Garcia nila aron paglawgaw sa mopuli nga administrasyon.
- Latest
