Krisis sa oposisyon

Nasayop bang mga lider sa oposisyon sa wala pagdagan pagka-senador? Kon basehan ang kaapiki sa kampanya nilang Kiko Pangilinan ug Bam Aquino sa pagbalik sa Senado, sakto silang:

Kanhi bise presidente Leni Robredo nga nidagan pagka mayor sa Naga City sa Camarines Sur (gipanegurong iyang kadaogan);

Kanhi senador Antonio Trillanes nga nidagan pagka mayor sa Caloocan City (bisan na-apiki batok sa incumbent nga alyado ni kanhi presidente Rodrigo Duterte); ug

Kanhi senador Leila de Lima ug dean Chel Diokno nga nidagan pagka kongresista pinaagi sa party-list.

Gihulagway nga nidako ang kahigayonan ni Aquino sa pagdaog tungod sa endorsement sa Iglesia ni Cristo (INC). Samtang gipangagpas nga makadaog lang si Pangilinan kon suportahan sa administrasyon ug maapil sa sample ballots sa mayoriya sa mga mayor, gobernador, ug kongresista sa tibuok nasud.

Ingon na ba niini kahuyang ang politikanhong oposisyon? Nga lokal nga mga puwesto ug mga lingkoranan sa House of Representatives na lay ambisyonan? Nga makadaog lang sa nasudnong mga puwesto kon mapiskan sa suporta sa INC nga alyado ni Duterte ug sa mga lider ni Presidente Ferdinand Marcos Jr.?

Nikumpisal si Trillanes nga ang ka walay kuwarta ug nasudnong makinarya nakapabugnaw niya pagbalik sa Senado. Pila ka adlaw dayong eleksiyon sa 2022, daghan pang botante wala kahibawo sa iyang kandidatura kay walay TV ug radio advertisements.

Kasagaran sa mga nag-unang senatorial candidates, nibubo og minilyon ka pesos para sa ads. Mas bug-at hinuong bagahe nilang Imee Marcos ug Camille Villar kay bisan sa giingong binilyon ka pesos nga gasto padayong nagbitay sa surveys.

Pero gibasol sab silang Robredo ug kaubanan sa kapakyas pagpalambo sa pink movement. Nga samtang napakyas pagdala ni Robredo sa Malacañang, nilampos sa paghiusa sa nagkalainlaing sektor pagtampo sa ilang kuwarta, panahon ug katakos para sa makasaysayanong kampanya.

Imbes mangandam dayon para sa 2025, si Robredo nilusad sa Angat Buhay Foundation. Ambot nangluod ba ra sa resulta sa eleksiyon, o naikog na sa pag-awhag sa mga boluntaryo sa paglugway pa sa dako nilang mga sakripisyo, nitugyan sa liderato sa oposisyon ngadto ni Senador Risa Hontiveros ug nibalik sa Naga. Duna bay motumaw nga bag-ong mga lider sa oposisyon para sa 2028?