Nganong supak sa suspenso
Atubangan sa sugo sa Ombudsman pagsuspenso niya og unom ka buwan, giapura ni Gobernador Gwen Garcia ang iyang mga abogado ug abogada sa pagseguro nga:
Dili mapatuman ang preventive suspension pinaagi sa pagkumbinser sa Commission on Elections (Comelec) sa pagbabag sa pagtangtang niya sa puwesto duha ka semana na lang sa dili pang eleksiyon sa Mayo 12; o kon sama sa naandan mosugot ang Comelec
Makabalik dayon siya sa Kapitolyo pinaagi sa pagkuha og temporary restraining order gikan sa Court of Appeals (CA) batok sa desisyon ni Ombudsman Samuel Martires.
-o0o-
Salamat nga mas kalma ang reaksiyon ni Garcia ning ikaduha niyang pagka-suspenso. Kay makamugna og dakong kahasol kon simbako sublion ang masuk-anong pagsupak sa unang pagka-suspenso 13 ka tuig ang nilabay.
Kanus-a nagbarikada siya og kapin sa buwan sa iyang upisina sa Kapitolyo aron sa pagsupak sa suspension order nga giluwatan ni anhing Presidente Noynoy Aquino niadtong Disyembre 2012 tungod sa pasangil nga iyang giilog ang gahom sa bise gobernador. Naibot lang sa Kapitolyo dihang gikandadohan ug giputlan og kuryente ang iyang upisina human sekretong nigawas gikan sa Kapitolyo.
-o0o-
Masabot ang determinasyon ni Garcia paghimo sa tanan aron nga dili masuspenso hangtod sa Oktubre ning tuiga kay:
Kinsa na man lay motagad sa inilang senatorial candidates nga magluhod-luhod pagpakiluoy sa iyang suporta (ug pagsaad og abundang bugti) human pahinumdoman nga siyay nagkontrolar sa 3.4 milyones ka rehistradong mga botante sa Sugbo;
Kinsa na man lay mangulo sa Suroy-Suroy Sugbo mokumbinser sa lokal ug langyaw’ng mga turista nga siya ang tinuod nga sentro sa kalihokan kay mas importante ang iyang presensiya kay sa katahom sa kadagatan ug kinaiyahan sa Sugbo;
-o0o-
Kinsa na man lay modumala sa Pasigarbo sa Sugbo atol sa anibersaryo sa pagkatukod sa probinsiya aron pagseguro nga ang minilyon ka pesos sa buhis sa mga Sugbuanon mahurot sa mga premyo para sa labing sadya nga mga sayaw bahala na kon walay bisan gamay na lang nga koneksiyon sa kasaysayan sa mga Sugbuanon; ug
Kinsa na man lay mosayaw uban ang iyang OOTD aron nga dunay trabaho ang TikTok department sa Kapitolyo nga gikatahong mas dako pa kay sa provincial engineer’s office.
- Latest
