Mas andam sa 2028

Kon makabalik sa Senado silang Bam Aquino ug Kiko Pangilinan, mapamatud-an nga sakto sila ug sayop ang mga nanaway sa kausaban nga gipatuman sa ilang mga kampanya:

Imbes maghiusa, nibiya si Aquino sa Liberal Party (LP) ug nagtukod og iyang kaugalingong partido biniyaan si Pangilinan nga mao ray kandidato sa LP hangtod gisagop sa partido si Heidi Mendoza sa niaging semana; ug

Makabungog ang ilang kahilom sa impeachment ni Bise Presidente Sara Duterte ug pagkabalhog ni kanhi presidente Rodrigo Duterte sa prisohan sa International Criminal Court (ICC) sa The Hague.

Kon makalahutay ang ilang pagsulbong hangtod sa eleksiyon karong Mayo 12, wala nay molalis sa ilang pagtuo sa pasidaan ni Albert Einstein: “Nga ang pagbalikbalik paghimo sa samang mga butang nga magpaabot og lahi nga resulta usa ka matang sa pagpakabuang.”

Lahi ang ilang gihimo karong tuiga kon ikumparar sa napakyas nga mga kampanya niadtong 2019 ug 2022. Ilang panagbuwag mahimong nakalasaw sa naandang fake news nga gipabaha sa trolls. Pagsentro sa kampanya sa kinakusgang mga plataporma nakapadani sa suporta sa dugang mga grupo sa nagkalainlaing bahin sa nasud.

Bisan sa ilang pagtak-om sa kontrobersiya sa mga Duterte, makaseguro ang mga dumadapig nilang Aquino ug Pangilinan unsay ilang desisyon kon makalingkod isip senator-judges sa impeachment trial sa bise presidente. Ug unsay ilang baruganan sa pagpaningil sa kanhi presidente sa gipasiugdahang laktod nga pinatyanay sa pekeng drug war.

Samtang gipasidan-an silang Aquino ug Pangilinan nga dili makapaabot og suporta sa mga dumadapig sa mga Duterte, dili makadaot ang pagkahimong alternatibo sa mga nasuko sa administrasyon.

Gawas nilang Aquino ug Pangilinan, lahi sang mga ruta nga gisubay sa ubang mga lider sa oposisyon: Si Leni Robredo mag-mayor sa Naga City; si Sonny Trillanes mag-mayor sa Caloocan City; ug silang Leila de Lima ug Chel Diokno mag-kongresista.

Daog man o pilde, mapuslanon ang kasinatian karong tuiga sa pagpalambo sa ilang kahigayonan sa mas importanteng eleksiyong presidensiyal sa 2028. Hinaot nga nianang higayona, dili na lang sila kutob sa pagtan-aw, ug makahatag na g’yud sa mga botante og mas tarung nga kapilian, sa nagpadayon nga panag-unay sa mga puwersa sa kangitngit ug kadaotan.