Resbak ni Sara

Angayng mangaliya ang mga kongresista sa Sugbo nga nipirma sa articles of impeachment ni Bise Presidente Sara Duterte: Nga wala mahibaw-i ang ilang mga eskandalo ug dili maapil sa kampanya sa panimawos sa anak ni kanhi presidente Rodrigo Duterte.

Kay si Sara, imbes mangampanya para sa senatorial candidates nga gipaabot nga mo-absuwelto niya sa nag-ung-ong nga impeachment trial, nigamit sa nahibiling duha na lang ka semana sa kampanya aron sa pagpakauwaw sa mga nikuyog sa panon sa 240 ka kongresista nga ni-impeach niya sa House of Representatives.

* * *

Ang atake ni Sara batok sa duha ka kongresista sa Manila nga nangimbestigar sa iyang confidential funds --si Rolando Valeriano gibugalbugalan nga dako og liog maong napiit ang tingog ug si Joel Chua gihulga nga tingalon og mansanas hangtod nga mamatay-- makahatag og ideya unsa kabastos ang iyang resbak.

Angayng managang nang daan, o manghinaot nga wala nay igong panahon si Sara sa pagpangampanya ug pagdiskurso sa ilang mga distrito, silang Edu Rama, Rhea Gullas, Edcel Galeos, Janice Salimbangon, Duke Frasco, Daphne Lagon, Peter Calderon, Lolypop Ouano, Cindi Chan, Sonny Lagon, ug Raymond Mendoza.

* * *

Labing mabalaka ang mosunod sa posibleng mga santako ni Sara:

•Kongresista nga nihakot sa tanang mayor sa iyang distrito uban sa ilang mga asawa ngadto sa Uropa, bitbit ang paborito nilang kontraktor kansang credit card maoy nalumping sa dakong gasto sa ilang ayroplano, hotel, kaon, inom, ug shopping;

•Kongresista nga nabag-ohan sa makalilisang nga komisyon sa mga proyekto niinsistir nga pulos branded ang iyang polo shirt, karsones, sapatos, medyas, bakos, relo, sunglasses, kawo, kuwentas, ug pitaka;

* * *

•Kongresista nga labaw pang nabag-ohan sa pork barrel sa mga proyekto sa iyang distrito nipuno sa labing mahalon ug suwaw nga mga singsing ang tanang napulo niya ka mga tudlo;

•Kongresista nga giulug-ulogan sa iyang pinalabi nga kontraktor og imbitasyon sa private event sa usa sa labing mahalon nga kalibotanong fashion houses pila ka buwan sa wala pa mahagsa ang usa sa ilang mga proyekto; ug

•Kongresista nga walay kahumanan ang mga proyekto sa iyang distrito, kasagaran maguba na sa dili pa makumplito, kay gidudahan nga gisagolan og ampaw ang gigamit nga bas ug graba.