Nagbuntaog nga mga ebidensiya
Timaan nga wala mangiyugpos ang Office of the Prosecutor sa International Criminal Court sa siyam ka tuig nilang imbestigasyon sa extrajudicial killings (EJKs) sa drug war ni kanhi presidente Rodrigo Duterte: 168,575 ka hugpong sa mga dokumento ug 16 ka oras nga video ug audio files nga momatuod sa pasangil sa crimes against humanity.
Dili padaghanay og mga ebidensiya ang pagdaog og mga kaso. Pero lisod tuohan nga nagpataka lang pagpangolekta og mga papel ug mga testimoniya ang mga imbestigador sa ICC nga beterano pagsusi sa bangis nga mga gubat.
***
Dili pa tang kalili sa mga ebidensiya batok ni Duterte. Pero duna nay ideya unsay ipresentar sa prosecutors sa husay sa ICC Pre-Trial Chamber 1 karong Septiyembre 23:
•Memorandum circular sa Project Double Barrel nga pirmado ni Senador Bato dela Rosa ug aprobado ni Duterte sa 2016 ug ubang mga dokumento sa gobyerno nga naglakip sa opisyal nilang ihap sa gidaghanon sa nangamatay; ug
•Video files sa mga testimoniya sa Kongreso ug mga diskurso ni Duterte nga nisugo sa EJKs ug nipasalig og bayad ug proteksiyon sa kapolisan.
***
Kon naglaom silang Duterte ug iyang mga abogado nga malipat si ICC Prosecutor Karim Khan, kay gipaubos og imbestigasyon sa United Nations (UN) sa pasangil sa sexual misconduct, angay silang pahinumdoman nga nakasugat si Khan og mas seryusong mga pasangil sa pag-imbestigar sa mga gubat sa Iraq ug Afghanistan.
Gawas pa, dili mag-inusara si Khan sa pagkonbikto ni Duterte. Gitabangan siya sa bantogang mga imbestigador ug prosecutors ug mga eksperto sa international law.
***
Kinakusgang mga kaabag ni Khan ang iyang deputy prosecutors: Mame Mandiaye Niang (taga Senegal nga kanhi huwes sa International Criminal Tribunal sa Rwanda ug sa Appeals Chamber of the International Criminal Tribunal sa kanhi Yugoslavia); ug Nazhat Shameem Khan (labing unang babayeng huwes sa High Court sa Fiji ug kanhi presidente sa UN Human Rights Council sa Geneva).
Ug special advisers: Judge Dr. Sanji Mmasenono Monageng (taga Botswana, kanhi huwes sa High Court sa Gambia ug kanhi first vice president ug kanhi huwes sa pre-trial ug appeals chambers); ug Evelyn Ama Ankumah (tigpasiugda sa gender-sensitive ug victim-centered nga international criminal justice).
- Latest
