Buhi bisan giyak-an
Ang labing dakong kahadlok sa paglangay ni Senate President Chiz Escudero sa impeachment trial ni Bise Presidente Sara Duterte mao nga mapawong ang interes sa katawhan sa kapakyas paghatag og kuwentada giunsa paggasto ang ?612.5 milyones nga confidential funds ni Duterte sa Office of the Vice President (OVP) ug Department of Education (DepEd).
Pero tungod ba kaha sa sibaw nga pag-apura sa nagkalainlaing sektor nga tumanon na sa mga senador ang trabaho nga gisangon sa 1987 Constitution, o sa determinasyon sa mga magbubuhis sa pagpaningil, wala mamatay ang isyu.
* * *
May sukaranan ang kabalaka. Kay human naluya sa kapin sa duha ka buwan nga pagyaka sa mga kongresista sa impeachment complaints, sa kalit nilang paghilom ug paghunong sa mga imbestigasyon batok sa mga Duterte, pun-an sa pagmaniobra sa administrasyon sa 2025 budget, nagkadaghan na ang nagduda nga wala g’yud tinuod nga mag-unay ug mahimo gani nga mag-uli rang UniTeam.
Kalanog na kaha sa hagok sa publiko kon tinud-on ni Escudero ang iyang binuang nga unya na sila magsugod sa impeachment trial sa Hulyo, o lima ka buwan gikan karon.
* * *
Wala katabang sa sitwasyon ang paugat ni Escudero. Giinsulto ang mga nisugyot nga sugdang husay sa wala pay eleksiyon sa Mayo. Nikalit og burot ang iyang ulo sa pagkaamgo nga naghangad karon niya silang Marcos ug Duterte.
Salamat na lang nga nitingog ang mga kanhi mahistrado sa Korte Suprema, mga nagpanday sa Konstitusyon ug mga kanhi presidente sa Senado. Mga eksperto nga dili mapahilom kay mas kamao pa niya nipasabot nga iresponsable ang iyang pag-imbento og krisis.
* * *
Kon nagtuo si Duterte nga siyay makapabor sa kalangay sa impeachment trial, ang pagsamot pagsibaw sa mga demanda nga paatubangon ug patubagon na siya sa mga pasangil maoy timaan nga dili na pasagdan sa katawhan ang iyang naandan nga mga paukyab ug lipatlipat.
Ang padayong pagdaghan sa mga nitug-an sa nasudnong surveys sa pag-uyon sa impeachment, dungan sa padayong pagtibugsok sa iyang ratings bisan sa Mindanao ug Kabisay-an, maoy dili malalis nga mensahe sa kinabag-an: Dili na sila mahudlat sa mga hulga, dili na mailad sa mga bakak ug dili na mopasaylo sa pag-abuso sa gahom.
- Latest
