Unay nga sabotahe
Naa sa administrasyon ni Presidente Ferdinand Marcos Jr. ang tanang pabor. Sa ilang kampanya sa pagpahagsa sa dinastiya ni kanhi presidente Rodrigo Duterte. Pero kanunay silang makakita og mga paagi sa pagsabotahe sa ilang kawsa:
• Makabungog ang ilang mayoriya sa House of Representatives ug makahimo g’yud unta pag-impeach ni Bise Presidente Sara Duterte sa niaging tuig pero giyak-an nilang impeachment complaints sulod sa kapin sa duha ka buwan; ug
• Komportable ang ilang mayoriya sa Senado nga takos nga mokonbikto sa bise presidente pero nihukom pagbakasyon una og upat ka buwan.
* * *
Nakabuylo nang imbestigasyon sa gipasangil nga mga krimen sa mga Duterte pero nilikoy. Nakahipos og importanteng mga ebidensiya sa extrajudicial killings (EJKs) ug kuwestiyonableng mga transaksiyon sa confidential funds (CF) pero nihunong:
• Human nakumbinser si Koronel Royina Garma sa pagbisto sa lapad nga binayranay sa EJKs, ilang gibuhian maong nakasibat ngadto sa Estados Unidos ug wala na mahibaw-i kanus-a makabalik; ug
• Natultolan na unta ang duha ka security officers sa bise presidente nga nakasipong sa tanang CF pero wala sila ipatawag ug gipasa sa militar ang pagpadayon sa imbestigasyon.
* * *
Nakumbinser na unta ang mayoriya sa katawhan sa kaligdong sa mga imbestigasyon sa House of Representatives. Dungan sa pagsulbong sa popularidad sa Quad Committee ug Good Government Committee, nitibugsok ang ratings sa bise presidente.
Pero human napasaka ang tulo ka sunudsunod nga impeachment complaints, nikalit lang og tak-om ang mga kongresista. Human dasiga ang mga imbestigasyon sa mga kongresista, nibalitok ang presidente nga wala diay kinahanglana kay dili diay makaayo sa mga Pilipino ang impeachment.
* * *
Uwahi nang nakamatngon nga kon dili mapalagpot ang bise presidente padayong mahulga ang presidente, nga walay ikapakita pagsulbad sa kamahal sa mga palaliton ug kalapad sa kagutom sa katawhan, nga mas unang mapalayas sa Malacañang.
Sa kataposang adlaw sa sesyon sa niaging semana nang na-impeach sa House ang bise presidente, maong dayong tapos sa sesyon sa Senado nang nasang-at ang articles of impeachment. Nagpabadlong sang mga senador. Ambot nangluod o nagpadugang ba sa pusta, nipili sa pagbakasyon. Sa kataphaw sa ilang palusot, nangugat na lang si Senate President Chiz Escudero nga ang pulong “forthwith” sa Konstitusyon wala magpasabot og “immediately”.
- Latest
