Bato batok Torre

Kon may kaikog silang Senador Bato dela Rosa, Senador Robin Padilla, ug Senador Bong Go, dili unta silay nidumala sa imbestigasyon sa komitiba sa Senado sa operasyon sa kapolisan pagdakop ni Apollo Quiboloy sulod sa iyang compound sa Davao City.

Pero bisan sa ilang kasuod ni Quiboloy ug pag-angkon nga nakapahimulos og libreng airtime sa TV station ni Quiboloy ug nakagamit sa libreng helikopter ni Quiboloy atol sa kampanya, ug ilang kasikit ni kanhi presidente Rodrigo Duterte nga nidupa ni Quiboloy, wala kabantay nga kadudahan ang kamakiangayon sa ilang pakisusi.

* * *

Kuwestiyonable nang daan nga ang nangimbestigar nga Committee on Justice and Human Rights gitugyan sa liderato sa Senado ngadto ni Dela Rosa nga gi-imbestigar sa International Criminal Court (ICC) sa pagpatuman sa laktod nga pinatyanay sa kampanya sa drugas ni Duterte.

Unang gihuptan ni Dela Rosa ang komitiba isip sakop sa majority bloc, niadtong suod pang mga Duterte sa Marcos administration, nga nipahimutang ni kanhi Senate president Migz Zubiri. Nagpabilin siya sa puwesto bisan napalagpot si Zubiri kay, nakatag-an ka, nibalitok siya sa pagsuporta ni Senate President Chiz Escudero.

* * *

Nabantang sa imbestigasyon niadtong Biyernes nga si Dela Rosa natudlo nga hepe sa Philippine National Police (PNP) ug nakatungtong sa Senado dili tungod sa kaligdong kon dili tungod sa kahumok og ilong --kaandam pagyango bisan unsay sugo sa iyang amo nga si Duterte.

Dili kahibudngan kon ang imbestigasyon gisugo ni Duterte. Sama nga si Duterte ang gituohang utok sa walay klarong imbestigasyon sa samang komitiba ni Dela Rosa sa pasangil nga adik sa cocaine si Presidente Ferdinand Marcos Jr.

* * *

Klarong tuyo sa imbestigasyon mao ang pagdason sa linya sa kampong Duterte ug Quiboloy nga ang operasyon sa kapolisan supak sa balaod busa angayng mopahawa gikan sa compound ang kaliboan ka polis.

Nibaraw sa tanan nilang argumento si Police Brigadier General Nicolas Torre III, ang pangulo sa kapin na sa duha ka semana nga operasyon. Napamatud-an ni Torre nga wala sila mangabuso kon dili ang mga sakop ni Quiboloy maoy nagsamuk-samok sa trabaho sa kapolisan. Sa tumang kamatinahuron, napakita ni Torre nga ang mga polis igo lang nipatuman, ug si Dela Rosa igo lang nanglawgaw, sa balaod.