Daghang kaso sa tigtudlo
Nipasalig ang mga senador ug mga kongresista nga istrikto ang mga panagang sa Maharlika Investment Fund (MIF) batok sa pagkawat sa kuwarta: Way bisan kinsang matudlo sa Maharlika Investment Corp. (MIC), nga maoy moduma sa MIF, nga dunay mga kasong fraud, plunder, corruption, money-laundering, tax evasion, ug susamang mga krimen.
Matod nila mabugnaw si bisan kinsang magplano sa pagkawat sa kuwarta sa MIF tungod sa kabug-at sa silot nga ilang gitakda: Priso nga unom ka tuig, multa nga hangtod sa P5 milyones, ug perpetual disqualification from public office.
* * *
Duna silay gamay nga nakalimtan: Ang motudlo sa mga sakop sa MIC board of directors, ug wa ra ba g’yuy makabuot ni Presidente Ferdinand Marcos Jr. kinsa ang iyang pilion, nag-atubang sa hapit tanang kaso nga ilang gilista.
Unsa may dag-anan sa mga magbubuhis, apil nang mga senador ug mga kongresista nga nisurender na sa tanan nila nga pagpakaaroningnon ug hingpit nga niyangu-yango sa bisan unsay iyang sugo, kon ibutang ni Marcos sa MIC ang mga opisyal nga sama niya wa say kaikog sa pagpangyatak sa balaod?
* * *
Niang pipila sa mga kaso ni Marcos Jr.:
• Hulyo 27,1995: Quezon City RTC nihukom nga guilty si Marcos Jr. sa wa pagbayad og buhis ug kapakyas pag-file og income tax returns sa 1982, 1983, 1984, ug 1985 dihang siya pay bise gobernador ug dayon gobernador sa Ilocos Norte. Gipatigbabaw sa Court of Appeals ang desisyon nga nahimong final ug executory sa 1997;
• Enero 25, 2011: United States District Court ug Court of Appeals nisugo nilang Marcos Jr. ug iyang inahang si Imelda pagbayad og $353 milyones (P20 bilyones) kay ilang gisupak ang sugo sa korte sa di paghilabot sa kabtangan nga para unta sa compensation sa human rights victims sa martial law; ug
• Enero 13, 1999: Korte Suprema sa Pilipinas nideklarar nga final ang desisyon sa P23 bilyones nga utang sa estate tax ni Marcos Jr. ug iyang inahan ug mga igsuon nga giluwatan sa BIR sa 1989. Sa Marso 9, 1999, ang Labawng Hukmanan nideklarar nga final ug executory nang desisyon. Sa kataposang demand letter sa BIR sa 2021, ang utang nahimo nang P203.8 bilyones.
- Latest
