Mingaw pa sa tirana sa sibuyas

Labihang apuradoha ni Kongresista Horacio Suansing Jr. sa Sultan Kudarat sa pag-awhag sa House Ways and Means Committee, atol sa ilang tigom niadtong Enero 23, Lunes, sa pagsupina sa gidudahang smugglers sa sibuyas. Ang komitiba nga gipangulohan ni Kongresista Joey Salceda sa Albay nidason dayon sa awhag ni Suansing pagka sunod adlaw, Enero 24, Martes.

Gitakda ang sunod nga tigom sa komitiba, kanus-a paatubangon nang 10 ka brokers ug 12 ka consignees nga gipasanginlan ni Suansing, niadtong alas-9 sa buntag sa Lunes, Enero 30. Pero way katin-awan silang Suansing ug Salceda nganong wa madayon.

 * * *

Si Senador Imee Marcos na ang nipahibawo sa publiko sa pagkalangay sa imbestigasyon sa House. Nahibung ang maguwang ni Presidente Ferdinand Marcos Jr. nganong gikalit og kanselar ni Salceda ang hearing.

Human nagwara-wara sa ilang pasangil sa lapad nga maniobra sa suplay ug presyo sa sibuyas, nitak-om ang mga kongresista. Naribalan lang sa kahilom sa Malacañang human ang manghod ni First Lady Liza Araneta Marcos, Martin Araneta, gilambigit sa smuggling. Nga, base sa mga kasong gipasaka sa Department of Agriculture, hapit kada adlawng nahitabo sukad sa niaging tuig.

 * * *

Ambot nadayon bang pagsupina sa ginganlan ni Suansing: Michael Ma (nga giingong kasosyo ni Araneta), Lujene Ang, Andrew Chang, Beverly Peres, Aaron, Manuel Tan, Leah Cruz, Jun Diamante, Lucio Lim, ug Gerry Teves.

Ug ang consignees: Victory JM Enterprises, Taculog International Consumer Goods Trading, Asterzenmed Aggregates, Veneta Consumer Goods Trading, Lalavy Aggregates Trading, Frankie Trading Enterprises, Primex Export-Import Producer, SB Express Logistics Business Solution, Silver Pop Dry Goods Trading, Thousand Sunny Enterprises, Viogelas Viol Aggregates Trading, Junezone Dry Goods Trading, ug Burias Jang Consumer Goods Trading.

 * * *

Wa maapil sa lista ang China-Philippines Unified Enterprises (CPUE) nga si Ma ang presidente ug si Araneta ang bise presidente. Nitanyag ang CPUE sa ilang consultancy services sa mga negosyante sa China nga mobubo sa ilang puhonan sa Pilipinas.

Gipasigarbo sa CPUE ang ilang kasuod sa Malacañang aron makadani og daghang kliyente. Gawas nga kuyog si Ma ug Araneta sa langyawng mga biyahe sa presidente ug first lady, laing opisyal sa CPUE, si Franz Imperial, gitudlo nga undersecretary sa Office of the President.